कुंटूर, २६ डिसेंबर २०२२ : नायगाव तालुक्यातील कुंटूर येथील मेंढीच्या केसांपासून हातकामणे बनविलेल्या घोंगडीचे प्रदर्शन माळेगावच्या ‘महाराष्ट्र राज्य ग्रामीण जीवनोन्नती अभियाना’च्या बचतगट स्टॉल मेळाव्यात भरले. या मेळाव्यात मुख्य आकर्षण घोंगडी ठरल्याने जिल्ह्यातील प्रकल्प अधिकारी व सर्व अधिकाऱ्यांनी घोंगडीचे कौतुक केले. घोंगडी अंगावर टाकून मफरल बांधून फोटो काढण्याचा मोह त्यांना आवरला नाही. माळेगाव यात्रेत भरलेल्या बचतगट मेळाव्यामध्ये मुख्य आकर्षण कुंटूरच्या घोंगडीने चमक दाखवली आहे.
कुंटूर येथील महालक्ष्मी महिला बचतगट व गिरीजाबाई महिला बचतगटामार्फत गेल्या पाच वर्षांपासून हाताने घोंगडी बनविली जाते. या घोंगडीसाठी मेंढीचे केस कापून त्यापासून दोरा विणून सदर घोंगडी हाताने विणली जाते. या घोंगडी विणण्यासाठी वीज लागत नाही व कोणतेही यंत्र लागत नाही. लाकडाने बनविलेले यंत्र हातमाग याच्यामुळे सदर घोंगडी बनविली जाते. ही घोंगडी गेल्या पाच वर्षांपासून मुंबईसह महाराष्ट्राच्या सर्व जिल्ह्यांच्या प्रदर्शनामध्ये आकर्षण ठरली आहे.
तब्बल दोन वर्षांनंतर यावर्षी माळेगाव यात्रा भरली. या यात्रेमध्ये सर्व बचतगटांचे स्टॉल व विक्रीसाठी आलेल्या वस्तूंचे प्रदर्शन होते. यामध्ये मुख्य आकर्षण म्हणून घोंगडीला सर्व स्तरांतून प्रतिसाद मिळाला असून, अधिकाऱ्यांपासून ते सर्व भाविक-भक्तांनी घोंगडीचे कौतुक केले आहे.
दरम्यान, नायगाव गटविकास अधिकारी आर. एल. वाजे यांच्या मार्गदर्शनाखाली मलेश येडके, तालुका अभियान व्यवस्थापक यांच्यामार्फत गटाला लाखो रुपये कर्ज उपलब्ध करून दिले जात आहे. कुंटूरमध्ये उत्पादित केलेल्या घोंगडीला चांगला भाव व चांगली किंमत मिळत असल्याने महिला बचतगटास आर्थिक मदत मिळत असल्याचेही बोलले जाते. यावेळी ‘महाराष्ट्र राज्य ग्रामीण जीवन्नोती अभियाना’चे प्रकल्प संचालक डॉ. संजय तुबाकले, उपमुख्य कार्यकारी अधिकारी मंजूषा जाधव, नांदेड जिल्हा अभियान व्यवस्थापक गजानन पातेवार, जिल्हा व्यवस्थापक द्वारकादास राठोड, जिल्हा व्यवस्थापक माधव भिसे, ईरवंत सूर्यकर नायगाव तालुका व्यवस्थापक, रेखाताई अनिल कांबळे कुंटूरकर, महालक्ष्मी महिला बचतगटाच्या अध्यक्ष म्हाळसाबाई वडे, सचिव गंगाबाई महादळे, गिरीजामाय महिला बचतगटाच्या अध्यक्ष श्रीमती वडे, सचिव गोदावरी संभाडे आदी उपस्थित होते.
‘न्यूज अनकट’ प्रतिनिधी : सतीश पाटील
