सोलापूर, २८ जुलै २०२३ : सोलापूर जिल्ह्यातील मोडनिंब कला केंद्रासाठी प्रसिद्ध आहे. येथे अनेक तमाशा कलाकार राहतात. मोडनिंब येथे कलाकार, कला केंद्र मालक आणि विविध विभागाशी संबंधित कलाकारांची महत्त्वाची बैठक पार पडली. खरंतर मोडनिंब येथे कलाकारांचा मेळावाच आयोजित करण्यात आला होता. यावेळी कलाकारांशी संबंधित काही महत्त्वाच्या विषयांवर चर्चा करण्यात आली. तसेच काही महत्त्वाचे निर्णय देखील घेण्यात आले. या मेळाव्यात एक महत्त्वाचा निर्णय घेण्यात आला. तमाशा केंद्रात यापुढे १८ वर्षांपेक्षा कमी वयाच्या मुलींना कलाकार म्हणून सहभागी करुन घेऊ नये, असा मोठा निर्णय घेण्यात आला.
मुलींचं शिक्षण आणि व्यक्तीमत्व विकासाच्या पार्श्वभूमीवर हा निर्णय घेण्यात आला आहे. १८ वर्ष किंवा त्यापेक्षा जास्त वयाच्या मुली या सज्ञान असतात. त्यांना चांगल्या-वाईट गोष्टींची पारख असते. त्यांना चांगलं-वाईट समजते. त्यामुळे मुलींच्या उज्ज्वल भवितव्यासाठी हा निर्णय घेण्यात आल्याची माहिती समोर आली आहे.
गौतमी पाटीलचे अनेक व्हिडीओ सोशल मीडियावर व्हायरल होत असतात. यापैकी मंचावर नृत्य करत असताना तिने लहान मुलांच्या गालावर किस करताचे अनेक व्हिडीओ देखील सोशल मीडियावर व्हायरल होत असतात. संबंधित प्रकारावरुन अनेकांकडून चिंता व्यक्त केली जाते. तसेच लहान मुलांसोबत असे कृत्य केल्यामुळे अनेक प्रेक्षकांनी नाराजी व्यक्त केली होती. तसेच गौतमीचे हावभाव हे देखील चर्चेला कारण ठरतात. त्यामुळे तमाशा कलाकारांनी याबाबत सावध भूमिका घेतली आहे. आता लहान मुलांचा किंवा मुलींचा मंचावर वावर नको, असाच निर्णय कालाकारांनी घेतला आहे.
यावेळी एक आणखी महत्त्वाचा निर्णय घेण्यात आला. तमाशा फडात आता डीजेवर बंदी घालण्यात आली आहे. तमाशा ही पारंपरिक कला पद्धत आहे. या कलेत डीजेचा वापर केल्याने काहीजणांनी ही गोष्ट म्हणजे कलंक असल्याचे म्हटले आहे. तमाशाचे पावित्र्य जपून राहावे यासाठी डीजेवर बंदी घालण्याचा निर्णय घेण्यात आला आहे. विशेष म्हणजे गौतमी पाटील हिने या निर्णयाला पाठिंबा दिल्याची माहिती मिळत आहे. कलेची अखंडता राखणे आणि त्याची पारंपारिक मुळे टिकवणे आवश्यक आहे, असेही ती म्हणाली.
दरम्यान, मोडनिंब येथील तमाशा कलाकारांच्या बैठकीचा महत्त्वाचा हेतू हा परंपरा आणि नाविन्य यांच्यातील समतोल राखणे, कलाकारांचा सन्मान आणि प्रतिष्ठा सुनिश्चित करणे आणि पुढील पिढीला तमाशा आणि लावणीचा समृद्ध वारसा अभिमानाने आणि आदराने पुढे नेण्याची संधी उपलब्ध करून देणे हा होता, असे कलाकारांचे म्हणणे आहे.
न्युज अनकट प्रतिनिधी : अनिल खळदकर
