गुरु तेग बहादूर यांचे 400 वे प्रकाश पर्व, पंतप्रधान मोदी आज रात्री लाल किल्ल्यावरून देशाला करणार संबोधित

नवी दिल्ली, 21 एप्रिल 2022: गुरु तेग बहादूर यांच्या 400 व्या प्रकाश परब सोहळ्याच्या निमित्ताने पंतप्रधान नरेंद्र मोदी गुरुवारी लाल किल्ल्यावरून देशाला संबोधित करणार आहेत. पंतप्रधान नरेंद्र मोदी यांचे हे भाषण रात्री 9.15 वाजता सुरू होईल. सांस्कृतिक मंत्रालयाच्या म्हणण्यानुसार, पंतप्रधान मोदींचे हे भाषण लाल किल्ल्याच्या तटबंदीवरून नसून लॉन्स वरून करण्यात येणार आहे. यावेळी पंतप्रधान मोदी शीख गुरू तेग बहादूर यांच्या 400 व्या जयंतीनिमित्त एक विशेष नाणे आणि टपाल तिकीटही जारी करतील.

संस्कृती मंत्रालयाच्या अधिका-यांच्या म्हणण्यानुसार, याच किल्ल्यावरून मुघल शासक औरंगजेबने 1675 मध्ये नववे शीख गुरू गुरु तेग बहादूर यांना फाशी देण्याचा आदेश दिला होता, म्हणूनच लाल किल्ल्याचा वापर गुरु तेग यांच्या 400 व्या जयंतीनिमित्त स्थळ म्हणून केला जात होता.

अनेक राज्यांचे मुख्यमंत्रीही या कार्यक्रमात होणार सहभागी

मंत्रालयाने सांगितले की, 400 रागी (शीख संगीतकार) यावेळी शब्द कीर्तन करतील. हा कार्यक्रम सांस्कृतिक मंत्रालयाने दिल्ली शीख गुरुद्वारा व्यवस्थापन समितीच्या सहकार्याने आयोजित केला आहे. या कार्यक्रमात देशभरातील 11 मुख्यमंत्री आणि प्रमुख शीख नेते सहभागी होणार असल्याचे मंत्रालयाने सांगितले. 400 शीख ‘जथेदारांच्या’ कुटुंबांनाही आमंत्रित करण्यात आले आहे, ज्यात अमृतसरच्या सुवर्ण मंदिरातील कुटुंबांचा समावेश आहे.

कडेकोट सुरक्षा व्यवस्था

गुरु तेग बहादूर यांच्या ४०० व्या प्रकाश पर्वावर पंतप्रधान मोदींच्या भाषणासाठी लाल किल्ल्याची सुरक्षा व्यवस्था वाढवण्यात आली आहे. लाल किल्ल्यावर 1000 अतिरिक्त दिल्ली पोलिस तैनात करण्यात आले आहेत. लाल किल्ला संकुलात 100 सीसीटीव्ही कॅमेरे बसवण्यात आले असून, कोणतीही चूक होऊ नये यासाठी ड्रोन कॅमेऱ्यांचीही व्यवस्था करण्यात आली आहे.

स्वातंत्र्य दिनानंतर पंतप्रधान मोदी लाल किल्ल्यावरून देशाला संबोधित करण्याची ही दुसरी वेळ आहे. यापूर्वी 2018 मध्ये, पंतप्रधान मोदींनी नेताजी सुभाष चंद्र बोस यांच्या आझाद हिंद सरकारच्या स्थापनेचा 75 वा वर्धापन दिन साजरा केला आणि लाल किल्ल्यावर राष्ट्रध्वज फडकवला.

न्यूज अनकट प्रतिनिधी: ईश्वर वाघमारे