उत्तर प्रदेश, दि.३०एप्रिल २०२०: लॉकडाऊनमुळे संपूर्ण देशात संचार बंदी आहे. त्यामुळे कोणालाही घराच्या, गावाच्या, शहराच्या बाहेर पडण्यास मनाई आहे. अगदी कामासाठी म्हणजे जीवणावश्यक वस्तूंसाठी बाहेर नागरिकांना बाहेर पडण्यास परवानगी देण्यात आली आहे. मात्र एक मुलगा घरातून धान्य आणण्यासाठी बाहेर पडला. मात्र काही वेळाने तो बायकोला घेऊन घरी आला. या प्रकारामुळे मुलाची आई चांगलीच चक्रावून गेली. त्यामुळे त्या महिलेने मुलाची तक्रार पोलिसांकडे केली. मला हे लग्न मान्य नाही, तेव्हा आता काही तरी करा अशी मागणी ती महिला पोलिसांकडे करू लागली.
उत्तर प्रदेश येथे साहिबाबाद परिसरात बुधवारी (दि.२८)रोजी हा प्रकार घडला. या प्रकाराने सर्वजण गोंधळात पडल्याचे चित्र आहे.याबाबत पोलिसांनी दिलेली माहिती अशी की, तक्रारदार महिलेचा मुलगा गुड्डू हा २६ वर्षांचा आहे. त्याने कोणतीही कल्पना न देता पत्नीला घरी आणल्यामुळे आई त्याच्यावर भलतीच संतापली. गुड्डूने या सगळ्याचा खुलासा केला आहे. त्याने म्हटले की, मी दोन महिन्यांपूर्वी हरिद्वारच्या आर्य समाज मंदिरात सविताशी लग्न केले होते. मात्र, त्यावेळी कोणीही साक्षीदार नसल्यामुळे आम्हाला विवाहाचे प्रमाणपत्र (मॅरेज सर्टिफिकेट) मिळाले नव्हते. मी हरिद्वारला जाऊन पुन्हा प्रमाणपत्र मिळवण्यासाठी प्रयत्न करणारच होतो. मात्र, तितक्यात देशभरात लॉकडाऊन घोषित झाला,त्यामुळे आता आमचं लग्न ग्राह्य धरावे असे त्या मुलाने सांगितले. आम्ही हरिद्वारहून लग्न करून परतल्यानंतर सविता दिल्लीतील तिच्या भाड्याच्या घरातच राहत होती. मात्र, लॉकडाऊन घोषित झाल्यानंतर घरमालकाने तिला खोली खाली करायला सांगितली. त्यामुळे मी सविताला माझ्या घरी आणण्याचा निर्णय घेतला.
आता काही केल्या गुड्डूची आई ऐकायला तयार नाही. त्यामुळे पोलिसांनी सविताच्या घरमालकाला लॉकडाऊन संपेपर्यंत विवाहित जोडप्याला घरात राहून द्यावे, असे सांगितल्याची माहिती आता समोर येत आहे.
सौजन्य : ए एन आय -यु पी
