आज महाराष्ट्रात मुसळधार पाऊस, विदर्भासाठी यलो अलर्ट जारी

मुंबई, १३ सप्टेंबर २०२३ : गेल्या आठवडाभरापासून महाराष्ट्राच्या बहुतांश भागात पाऊस पडत आहे. अजूनही काही भागात हलका ते मध्यम पाऊस पडत आहे. तर या उलट महाराष्ट्रातील काही भागात पाऊस नसल्यामुळे शेतकरी चिंतेत आहेत, कारण शेतकऱ्यांना सध्या चांगल्या पावसाची गरज आहे. पावसाअभावी अनेक पिके नष्ट होण्याच्या मार्गावर आहेत. त्यामुळे शेतकरी चिंतेत आहेत. दरम्यान, हवामान खात्याने (IMD) दिलेल्या माहितीनुसार, आजपासून महाराष्ट्रात पुन्हा मुसळधार पाऊस पडण्याची शक्यता आहे. काही भागात मेघगर्जनेसह पाऊस पडण्याचा इशारा देण्यात आला आहे.

अशा स्थितीत हवामान विभागाने वर्तविलेल्या अंदाजानुसार महाराष्ट्राच्या काही भागात हलका ते मध्यम पाऊस पडत आहे. मात्र, अद्यापही बहुतांश भागात पुरेसा पाऊस झालेला नाही. शेतकरी चांगल्या पावसाच्या प्रतीक्षेत असल्याने त्यांना आज दिलासा मिळू शकतो. आज महाराष्ट्राच्या काही भागात चांगला पाऊस पडण्याची शक्यता आहे. आज विदर्भातील सर्व जिल्ह्यांमध्ये पावसाचा यलो अलर्ट देण्यात आला आहे.

हवामान खात्याने दिलेल्या माहितीनुसार, विदर्भातील यलो सतर्कतेच्या पार्श्वभूमीवर, उद्या १४ सप्टेंबरपर्यंत मुंबईसह संपूर्ण कोकणात मुसळधार पावसाची शक्यता आहे. नाशिकपासून कोल्हापूरपर्यंतच्या पाच जिल्ह्यांतील पश्चिमेकडील सह्याद्रीच्या घाटांवर हलका पाऊस पडण्याची शक्यता असल्याची माहिती ज्येष्ठ हवामानतज्ज्ञ माणिकराव खुळे यांनी दिली आहे.

यासोबतच, बंगालच्या उपसागरात सलग चक्री वारे येऊ शकतात. ते कमी दाबाच्या पट्ट्यात बदलू शकते. ही परिस्थिती पाहता महाराष्ट्रासह देशाच्या अनेक भागात मुसळधार पाऊस पडण्याची शक्यता आहे.

न्यूज अनकट प्रतिनिधी : सूरज गायकवाड