काँग्रेस स्वतःच्या पायावर कसा उभा राहणार? प्रशांत किशोर यांच्या योजनेची संपूर्ण ब्लू प्रिंट

नवी दिल्ली, 22 एप्रिल 2022: 2014 च्या लोकसभा निवडणुकीतील पराभवानंतर काँग्रेसची कामगिरी सातत्याने घसरत चालली आहे. या सर्व आव्हानांना तोंड देण्यासाठी काँग्रेसने रणनीतीकार प्रशांत किशोर यांच्याशी हातमिळवणी केली आहे. प्रशांत किशोर यांनी काँग्रेस अध्यक्षा सोनिया गांधी यांच्यासह अनेक बड्या नेत्यांची बैठक घेतल्याचे सांगण्यात येत आहे. नुकतेच प्रशांत किशोर यांनी 2024 च्या लोकसभा निवडणुकीत काँग्रेसची कामगिरी कशी सुधारता येईल याचे प्रेजेंटेशनही केले आहे. प्रशांत किशोर यांच्या या संपूर्ण योजनेची ब्लू प्रिंट समोर आली आहे.

प्रशांत किशोर यांचा पूर्ण प्लॅन तयार आहे. त्यांनी आपल्या प्रेजेंटेशन ची सुरुवात महात्मा गांधींच्या
”The Indian National Congress… cannot be allowed to die, it can only die with the nation” या वाक्याने केली आहे. म्हणजेच भारतीय राष्ट्रीय काँग्रेसला कधीही मरू देता येणार नाही, ते राष्ट्रासोबतच मरू शकते.

पीके म्हणजेच प्रशांत किशोर यांनी त्यांच्या प्रेजेंटेशन मध्ये भारताची लोकसंख्या, मतदार, विधानसभा जागा, लोकसभेच्या जागा यांची आकडेवारी मांडली आहे. एवढेच नाही तर महिला, तरुण, शेतकरी, छोटे व्यापारी यांची संख्याही त्यांनी नमूद केली आहे. 2024 मध्ये पहिल्यांदाच 13 कोटी मतदारांवर लक्ष केंद्रित केले आहे.

पीके यांनी सांगितली काँग्रेसची सद्यस्थिती

प्रशांत किशोर यांनी आपल्या प्रेजेंटेशन मध्ये सांगितले की, सध्या काँग्रेसचे राज्यसभा आणि लोकसभेत 90 खासदार आहेत. विधानसभेत 800 आमदार आहेत. एवढेच नाही तर तीन राज्यात काँग्रेसचे सरकार आहे. 3 मध्ये काँग्रेस मित्रपक्षांसोबत सरकारमध्ये आहे. त्याचबरोबर 13 राज्यांमध्ये काँग्रेस हा प्रमुख विरोधी पक्ष आहे. इतकंच नाही तर तीन राज्यांमध्ये मित्रपक्षांसह काँग्रेस प्रमुख विरोधी पक्ष आहे.

पीके म्हणाले की, काँग्रेसला मजबूत करण्यासाठी 5 धोरणात्मक पावले उचलावी लागतील

1- नेतृत्वाचा प्रश्न सोडवावा लागेल
2- युतीशी संबंधित प्रश्न सोडवावा लागेल
३- पक्षाच्या जुन्या तत्त्वांकडे परतावे लागेल
4- तळागाळात कार्यकर्त्यांची आणि नेत्यांची फौज उभी करावी लागेल.
5- काँग्रेसची संपर्क व्यवस्था बदलण्याची गरज आहे

न्यूज अनकट प्रतिनिधी: ईश्वर वाघमारे