भारतीय हॉकी संघाने जिंकले सुवर्णपदक, जपानचा ५-१ असा केला पराभव

पुणे, ६ ऑक्टोंबर २०२३ : आशियाई क्रीडा २०२३ मध्ये भारताने आणखी एक सुवर्णपदक जिंकले आहे. भारतीय हॉकी संघाने जपानचा ५-१ असा पराभव करत सुवर्णपदक जिंकले. यासह भारतीय संघ पॅरिस ऑलिम्पिक २०२४ साठी पात्र ठरला आहे. दोन्ही संघांनी सुवर्णपदक जिंकण्याच्या ध्येयाने हॉकीच्या अंतिम सामन्यात प्रवेश केला होता.

पहिल्या क्वार्टरमध्ये दोन्ही संघ एकमेकांविरुद्ध एकही गोल करू शकले नाहीत. पण दुसऱ्या क्वार्टरमध्ये भारताने १-० अशी आघाडी घेतली. ही आघाडी हाफ टाइमपर्यंत कायम राहिली. यानंतर भारतीय संघाने वेगवान खेळ सुरू करत पेनल्टी कॉर्नरचे गोलमध्ये रूपांतर करत आघाडी २-० अशी वाढवली. यानंतर अमित रोहिदासनेही आणखी एक गोल करत भारताला ३-० अशी आघाडी मिळवून दिली. तिसऱ्या क्वार्टरच्या अखेरीस भारत ३-० ने आघाडीवर होता. यानंतर अभिषेकने आणखी एक गोल करत टीम इंडियाला ४-० अशी आघाडी मिळवून दिली.

सामन्याच्या शेवटच्या टप्प्यात जपानलाही एक गोल करण्यात यश आले, पण सामना संपण्यापूर्वी कर्णधार हरमनप्रीत सिंगने आणखी एक गोल करत भारतीय संघाला ५-१ अशी निर्णायक आघाडी मिळवून दिली आणि हीच अंतिम धावसंख्या ठरली. यासह भारतीय संघाने आशियाई क्रीडा स्पर्धेत सुवर्णपदक पटकावले. यासह आशियाई क्रीडा स्पर्धेत भारताने जिंकलेल्या पदकांची संख्या ९५ झाली आहे.

न्यूज अनकट प्रतिनिधी : सूरज गायकवाड