भारताचा अष्टपैलू खेळाडू अक्षर पटेल आणि मेहा अडकले विवाहबंधनात!

वडोदरा, २७ जानेवारी २०२३ टीम इंडियाचा सलामीवीर के. एल. राहुल याने नुकतेच सुनील शेट्टीची मुलगी अथिया शेट्टीशी लग्नगाठ बांधली. केएल राहुल पाठोपाठ भारताचा अष्टपैलू खेळाडू अक्षर पटेलने आपली प्रेयसी मेह पटेल हिच्याशी २६ जानेवारी रोजी विवाह केला आहे. या नव्या जोडप्याच्या लग्नाचे फोटो आणि व्हिडिओ समोर आले आहेत.

अक्षर पटेल आणि मेहा पटेल यांनी गेल्या वर्षी २० जानेवारी रोजी साखरपुडा केला होता आणि आता दोघेही लग्नाच्या बंधनात अडकले आहेत. वडोदऱ्याच्या कबीर फार्मवर गुरुवारी संध्याकाळी अक्षर पटेलच्या लग्नाची वरात निघाली होती. यात वऱ्हाडी मंडळींनी जोरदार डान्स केला. अक्षर पटेलने स्टायलिश अंदाजात वरातीमध्ये एंट्री केली. एका विंटेज कारमध्ये बसून तो लग्नमंडपात पोहोचला. या दोघांनी ‘तू मान मेरी जान’ या गाण्यावर डान्स केला.

• मेहा पटेल आहे डायटिशियन

अक्षरची पत्नी मेहा पेशाने प्रोफेशनल डायटिशियन आणि न्यूट्रीशनिस्ट आहे. ती सोशल मीडियावर सक्रिय असून, ती डाएटशी संबंधित माहिती शेअर करत असते. तिचे इंस्टाग्रामवर २१ हजारांहून अधिक फॉलोअर्स आहेत.

दरम्यान, लग्नासाठी म्हणून अक्षरला न्यूझीलंड विरुद्धच्या वनडे आणि टी २० सीरीजमधून विश्रांती देण्यात आली आहे. सध्या अक्षर पटेल जबरदस्त फॉर्ममध्ये असून, रवींद्र जाडेजाचा पर्याय म्हणून त्याच्याकडे पाहिले जाते.

‘न्यूज अनकट’ प्रतिनिधी : प्रज्ञा फाटक.