जळगाव नगरपालीका घरकुल घोटाळा : माजी नगरसेवक बालाणी, ढेकळे, भोईटे, सोनवणे सहा वर्षांसाठी अपात्र आयुक्तांचे आदेश

जळगाव, २ डिसेंबर २०२३ : तत्कालीन जळगाव नगरपालिका घरकुल घोटाळ्यातील माजी नगरसेवक भगत बालाणी, सदाशिव ढेकळे, लता भोईटे व स्विकृत नगरसेवक कैलास सोनवणे यांना ३१ ऑगस्ट २०१९ पासून सहा वर्षांसाठी अपात्र करण्यात आल्याचे आदेश महापालिकेच्या प्रशासक तथा आयुक्त डॉ. विद्या गायकवाड यांनी २९ नोव्हेंबर रोजी काढले आहेत.

जळगाव नगरपालिका असताना शहरात विविध ठिकाणी घरकुले उभारण्यात आली होती. यात मोठ्या प्रमाणात गैरव्यवहार झाला होता. तत्कालीन आयुक्त डॉ. प्रविण गेडाम यांनी याबाबत शहर पोलीसात तक्रार दाखल केली होती. त्यानुसार तत्कालीन पोलीस तपासाधीकारी इशू सिंधू यांनी तपास करून २०१२ मध्ये घरकुल घोटाळ्यातील आजी माजी ४८ नगरसेवक, दोन मुख्याधिकारी, दोन माजी मंत्री, माजी महापौरांवर गुन्हे दाखल करून त्यांना अटक केली होती. याबाबत धुळे येथील विशेष न्यायालयाने अंतिम निकाल देत या सर्वाना घरकुल घोटाळ्यात दोषी ठरवून त्यांना ३१ ऑगस्ट २०१९ रोजी कारावासाची शिक्षा सुनावली होती. यासोबतच जळगाव न्यायालयाने याबाबत १३ एप्रिल २०२३ च्या दिलेले निकालपत्र, राज्य निवडणूक आयोगाचे उपसचिव यांचे २१ सप्टेंबर २०२३ च्या पत्रानुसार, महाराष्ट्र महानगरपालिका अधिनियम, १९४९ मधील कलम १०(अ-एक) महाराष्ट्र महानगरपालिका (सुधारणा) अधिनियम, १९७० याच्या कलम ५ प्रारंभानंतर भारतीय दंडसंहितेचे कलम १५३-अ किंवा कलम ५०५ पोट-कलम (२) किंवा (३) अन्वये, शिक्षापात्र अपराधाबद्दल सिध्दापराध ठरविण्यात आले आहे. त्यानुसार निवडून आलेले तत्कालीन नगरसेवक भगतराम रावलमल बालाणी, सदाशिव गणपत ढेकळे, लताबाई रणजित भोईटे व स्विकृत नगरसेवक कैलास नारायण सोनवणे यांना ३१ ऑगस्ट २०१९ पासून सहा वर्षांसाठी अपात्र ठरविण्यात आले आहे.

जळगांव शहर महानगरपालिकेची सार्वत्रिक निवडणूक १ ऑगस्ट २०१८ रोजी झाली होती. ३ ऑगस्ट २०१८ रोजी सार्वत्रिक निवडणूकीचा निर्णय घोषित करण्यात आलेला आहे. जळगांव शहर महानगरपालिकेच्या घरकुल घोटाळा प्रकरणामध्ये वरील सदस्यांना सिध्द अपराध ठरविणेत आलेले आहे. त्यानुसार आयुक्त डॉ. विद्या गायकवाड यांनी २९ नोव्हेंबर २०२३ रोजी आदेश काढून ३१ ऑगस्ट २०१९ पासून पुढील सहा वर्षासाठी अपात्र ठरविले.

न्युज अनकट प्रतिनिधी : डॉ.पंकज पाटील