नितीन गडकरी यांच्या धमकी प्रकरणात लष्कर ए तोयबाच्या पाशाचा हात,जयेश पुजारीच्या चौकशीत धक्कादायक खुलासा

नागपूर, १४ जुलै २०२३ : केंद्रीय मंत्री नितीन गडकरी धमकी प्रकरणात धक्कादायक खुलासा झाला आहे. धमकी प्रकरणात लष्कर ए तोयबा आणि पॉप्युलर फ्रंट ऑफ इंडियाचा माजी सचिव अफसर पाशा याचाही समावेश असल्याचे तपासात निष्पन्न झाले आहे. दहशतवादी अफसर पाशाच्या अटकेसाठी नागपूर पोलीस बेळगावला रवाना झाले आहेत. पाशाला ताब्यात घेऊन पोलीस त्याची सखोल चौकशी करणार आहेत. जयेश पुजारीच्या चौकशीदरम्यान धक्कादायक माहिती पुढे समोर आली आहे.

धमकी प्रकरणाच्या चौकशी दरम्यान आरोपी जयेश पुजारी जेलमधून लष्कर ए तोएबा आणि पीएफआय या दहशतवादी संघटनांसाठी सदस्यांची नियुक्ती करायचा. अशी धक्कादायक माहिती पुढे आली आहे. जयेश पुजारी हा कश्मीरी दहशतवादी अफसर पाशाच्या संपर्कात होता. पाशा हा ढाका आणि बंगळुरु येथील बॅाम्बस्फोट प्रकरणातील आरोपी आहे. पाशाने जयेश पुजारी याला बॅाम्ब बनवण्याचे प्रशिक्षण दिले आणि त्याची पीएफआयमध्ये नियुक्ती केली.

केंद्रीय मंत्री नितीन गडकरी यांच्या कार्यालयात धमकीचे फोन करणाऱ्या जयेश पुजारीचा माईंड वॉश करणाऱ्या दहशतवादी अफसर पाशाला नागपुरात आणले जाणार आहे. नितीन गडकरी यांना फोन करून धमकी देण्यासाठी जयेश पुजारीला पाशाने प्रवृत्त केल्याची माहिती तपासात उघड झाली आहे. अफसर पाशा बेळगाव तुरुंगात असून, तुरुंगात पाशाचे जयेश पुजारीसोबत संबंध आले होते.पाशाच्या अटकेसाठी नागपूर पोलीस बेळगावला रवाना झाले आहेत.

न्यूज अनकट प्रतिनिधी : अनिल खळदकर