काशी विश्वनाथ मंदिरात दर्शनासाठी आता ड्रेस कोड

वाराणसी : वाराणसीमधील काशी विश्वनाथ मंदिरात दर्शनासाठी आता ड्रेस कोड लागू करण्यात आला आहे. विशेष कपड्यांमध्येच बाबा विश्वनाथ यांचं दर्शन घेता येणार आहे. पण हा ड्रेस कोड केवळ स्पर्श दर्शन करणाऱ्या भक्तांसाठीच लागू असणार आहे. असा निर्णय काशी विद्वत परिषदेच्या बैठकीत घेण्यात आला आहे. मात्र , स्पर्श दर्शन न करणाऱ्या भक्तांसाठी ड्रेस कोड आवश्यक नाही, असेही स्पष्ट करण्यात आले आहे.

आता या नव्या नियमानुसार, काशी विश्वनाथ मंदिरात स्पर्श दर्शन करणाऱ्या महिलांसाठी साडी हा ड्रेस कोड असणार आहे. तर पुरुषांसाठी धोती-कुर्ता घालणं अनिवार्य असणार आहे. रविवारी रात्री, काशी विद्वत परिषदेच्या बैठकीत हा निर्णय घेण्यात आला आहे.
काशी विद्वत परिषदेच्या बैठकीत घेण्यात आलेल्या निर्णयानुसार, सकाळी ११ वाजेपर्यंत भक्त, काशी विश्वनाथाचं स्पर्श दर्शन करु शकणार आहेत. पॅन्ट, शर्ट, जीन्स असे कपडे घातलेले भक्त दुरुनच दर्शन घेऊ शकतात. हा नवा ड्रेस कोड कधीपासून सुरु करण्यात येणार याबाबत सांगण्यात आलं नाही.
याबाबत सुत्रांनी दिलेल्या माहितीनुसार, लवकरच हा नियम लागू करण्यात येणार आहे.

याशिवाय उज्जैनच्या महाकाल मंदिरातही हा नियम लागू आहे. याच धर्तीवर काशी विश्वनाथ मंदिरातही ड्रेस कोडनुसारच, स्पर्श दर्शन करण्यासाठी अनुमती दिली जाणार आहे.