अबुधाबी, ७ नोव्हेंबर २०२०: आयपीएलच्या १३ व्या सत्रातील एलिमिनेटर सामना सनरायझर्स हैदराबादने जिंकला. शुक्रवारी झालेल्या सामन्यात रॉयल चॅलेंजर्स बंगळुरूचा अबुधाबी येथे ६ गडी राखून हैदराबादने पराभव केला. या पराभवासह रॉयल चॅलेंजर्सचं स्पर्धेतलं आव्हानही संपुष्टात आलं आहे. विल्यमसनने नाबाद अर्धशतक झळकावत संघाच्या विजयात मोलाचा वाटा उचलला. अखेरच्या षटकापर्यंत मैदानावर टिकून राहत विल्यमसनने नाबाद ५० धावा केल्या. त्याला होल्डरने २४ धावा करत मोलाची साथ दिली. अंतिम फेरीत जाण्यासाठी सनरायझर्स आता क्वालिफायर -२ मध्ये दिल्लीसोबत खेळतील. सनरायझर्सचा हा सलग चौथा विजय होता. विराट कोहलीच्या नेतृत्वात रॉयल चॅलेंजर्स बंगळुरू संघाचा प्रवास येथेच संपला. आरसीबी स्पर्धेतून बाहेर पडली आहे. त्यांचा हा सलग पाचवा पराभव होता.
नाणेफेक जिंकून हैदराबादचा कर्णधार डेव्हिड वॉर्नरने प्रथम गोलंदाजी करण्याचा निर्णय घेतला. सलग ४ सामन्यांत पराभवाचा सामना केल्यानंतर रॉयल चॅलेंजर्स ने संघात ४ बदल केले. इतकच नव्हे तर कर्णधार विराट कोहली स्वतःला फलंदाजीसाठी सलामीला आला. परंतू रॉयल चॅलेंजर्स चा हा प्रयोग पुरता फसला. कर्णधार कोहली ६ रनवर आऊट झाला. एबी डिव्हिलियर्सने अर्धशतक झळकावले. पण संघाला मोठी धावसंख्या उभी करता आली नाही. एबीने आयपीएल कारकिर्दीतील आपले ४१ वे अर्धशतक झळकावले. डीव्हिलियर्स टी-नटराजनच्या अचूक यॉर्करचा बळी ठरला. ४३ बॉलमध्ये त्याने ५६ धावा केल्या. हैदराबादकडून जेसन होल्डनने शानदार गोलंदाजी केली आणि ३ विकेट घेतल्या. रॉयल चॅलेंजर्सने २० ओव्हरमध्ये ७ विकेट गमवून फक्त १३१ रन केले.
रॉयल चॅलेंजर्सने हैदराबादला विजयासाठी १३२ धावांचे आव्हान दिले होते. हैदराबादने हे विजयी आव्हान १९.४ ओव्हरमध्ये ६ विकेट्स राखून पूर्ण केलं. केन विल्यमसन आणि जेसन होल्डर हे दोघे हैदराबादच्या विजयाचे शिल्पकार ठरले. या दोघांनी पाचव्या विकेटसाठी नाबाद ६५ धावांची विजयी भागीदारी केली. केन विल्यमसनने नाबाद अर्धशतकी खेळी केली. तर जेसन होल्डरने २४ धावांची महत्वाची खेळी केली. बंगळुरुकडून मोहम्मद सिराजने सर्वाधिक २ विकेट्स घेतल्या. तर अॅडम झॅम्पा आणि यजूवेंद्र चहलने प्रत्येकी १ विकेट मिळवला.
न्यूज अनकट प्रतिनिधी: ईश्वर वाघमारे
