केएल राहुल- अथिया शेट्टी लवकरच चढणार बोहोल्यावर! या ठिकाणी होणार विवाह

मुंबई, ७ सप्टेंबर २०२२ : बॉलिवूड आणि क्रिकेट यांच्यामधील घनिष्ठ नातं कायमच लोकांना भुरळ पाडत आलेलं आहे. अनेक बॉलिवूड अभिनेत्री आणि क्रिकेटर्स लग्नबंधनातही अडकले आहेत. या जोड्यांना प्रेक्षकांचं भरभरुन प्रेमही मिळालं आहे. यातीलच एक पॉवल कपल म्हणून ओळखलं जाणारं जोडपं म्हणजे क्रिकेटर विराट कोहली आणि अभिनेत्री अनुष्का शर्मा. यांचे करोडो चाहते आहेत. या दोघांप्रमाणे आता आणखी एका कपलची जोरदार चर्चा रंगताना दिसते. हे लोकप्रिय कपल म्हणजे अभिनेत्री अथिया शेट्टी आणि क्रिकेटर केएल राहुल. दोघेही लवकरच लग्नबंधनात अडकणार आहे. याविषयी आता महत्त्वाची माहिती समोर आलीये.

अभिनेत्री अथिया शेट्टी आणि भारतीय क्रिकेटर केएल राहुल  लवकरच लग्नबंधनात अडकणार असल्याची चर्चा सुरु झाली आहे. दोघांमधील नातं आता कोणापासूनही लपून राहिलेलं नाही. दोघेही खूप दिवसांपासून एकमेकांना डेट करत आहेत. केएल राहुल आणि अथिया मीडियामध्ये एकमेकांबद्दल बोलणे टाळतात, परंतु दोघेही सोशल मीडियाद्वारे एकमेकांवरील प्रेम व्यक्त करण्याची एकही संधी सोडत नाहीत. आता ही जोडी लवकरच सात फेरे घेणार आहे.

सुत्रांनी दिलेल्या माहितीनुसार, अथिया आणि राहुल सुनील शेट्टीच्या खंडाळ्याच्या बंगल्यात विवाह करणार आहेत. सुनील शेट्टीला त्याचे हे घर खूप आवडते. १७ वर्षांपूर्वी त्याने हे घर बांधले होते.

या बंगल्याबद्दल बोलायचे झाले तर हा बंगला खूप मोठ्या परिसरात बांधला आहे. हे घर उत्तम इंटीरियर डिझाइनसह अतिशय आलिशान आहे. तसेच घराभोवती हिरवळ आहे. लवकरच लग्नाला येणाऱ्या पाहुण्यांना डिसेंबरच्या शेवटच्या आठवड्यापासून ते जानेवारीच्या पहिल्या आठवड्यापर्यंतचा वेळ मोकळा ठेवण्यास सांगण्यात येणार आहे.

चाहत्यांना अथिया आणि राहुलची जोडी खूप आवडते. अथिया शेट्टी अनेकदा केएल राहुलसोबत क्रिकेट टूरवर जाताना दिसते. दोघेही एकमेकांना मागील ३ वर्षांपासून डेट करत आहेत. मीडिया रिपोर्टनुसार केएल राहुल आणि अथिया शेट्टी दोघेही एकत्र एकाच घरात शिफ्ट झाले आहेत. दोघे लिव्ह इन रिलेशनशिपमध्ये राहत असल्याचे बोलले जात आहे. त्यांनी वांद्रे येथील कार्टर रोडवर एक घर घेतले आहे. ही जोडी त्यांच्या नवीन घरात शिफ्ट झाल्यापासून लग्नाच्या बातम्यांनी पुन्हा एकदा जोर धरला आहे.अनुष्का शर्मा आणि विराट कोहलीनंतर अथिया शेट्टी आणि राहुल यांचे बॉलिवूड-क्रिकेट जगतातील दुसरे ग्रँड लग्न असणार आहे.

न्यूज अनकट प्रतिनिधी – अंकुश जाधव