कोहली-मॅक्सवेलची शानदार खेळी, RCB चा विजय, प्लेऑफ मध्ये जाण्याच्या आशा कायम

RCB Vs GT, 20 मे 2022: विराट कोहलीच्या तुफानी खेळीच्या जोरावर रॉयल चॅलेंजर्स बंगळुरू (RCB) ने गुरुवारी गुजरात टायटन्सचा (GT) 8 गडी राखून पराभव केला. त्यामुळे प्लेऑफमध्ये बेंगळुरू जाण्याच्या आशा जिवंत असून आता आरसीबीच्या नजरा मुंबई-दिल्ली यांच्यातील सामन्यावर खिळल्या आहेत.

या सामन्यात प्रथम फलंदाजी करताना गुजरात टायटन्सने 168 धावा केल्या, प्रत्युत्तरात कोहली-फॅफने आरसीबीला चांगली सुरुवात करून दिली. नंतर ग्लेन मॅक्सवेलने चांगली खेळी करत हे लक्ष्य गाठले.

कोहली-मॅक्सवेलची दमदार खेळी

विराट कोहलीने येथे 73 धावांची शानदार खेळी खेळली आणि धावांचा दुष्काळ संपवला. या डावात विराट कोहली उत्कृष्ट लया मध्ये दिसला, त्याला अनेक संधीही मिळाल्या ज्याने त्याचा फॉर्म आणि नशीब परत आल्याचे सूचित केले. कर्णधार फाफ डू प्लेसिसनेही 38 चेंडूत 44 धावा केल्या. पण शेवटी ग्लेन मॅक्सवेलने तुफान खेळी केली, त्याने 18 चेंडूत 5 चौकार आणि 2 षटकारांसह 40 धावा केल्या.

आरसीबी प्लेऑफमध्ये कसा पोहोचेल?

रॉयल चॅलेंजर्स बंगळुरूचे भवितव्य आता पूर्णपणे मुंबई इंडियन्सच्या हातात आहे. मुंबई इंडियन्स आणि दिल्ली कॅपिटल्स यांच्यातील सामन्याचा निकाल आरसीबी प्लेऑफमध्ये पोहोचेल की नाही हे ठरवेल. जर दिल्ली कॅपिटल्सने हा सामना जिंकला तर ते प्लेऑफमध्ये पोहोचेल. मात्र मुंबईने विजय मिळवला तर आरसीबीला प्ले ऑफमध्ये पोहोचण्याची संधी मिळेल.

गुजरात टायटन्सचा डाव

कर्णधार हार्दिक पंड्या पुन्हा एकदा संघाचा तारणहार म्हणून पुढे आला. शुभमन गिलच्या रूपाने गुजरात टायटन्सला तिसऱ्याच षटकातच धक्का बसला. त्यांच्यानंतर वृध्दिमान साहा, मॅथ्यू वेड यांनीही चांगली सुरुवात केल्यानंतर विकेट गमावल्या. आपल्या बाद झाल्याने मॅथ्यू वेड इतका नाराज झाला की त्याने ड्रेसिंग रूमची तोडफोड केली.

त्यानंतर कर्णधार हार्दिक पांड्याने 62 धावांची खेळी केली. 47 चेंडूंच्या या खेळीत हार्दिक पांड्याने 4 चौकार आणि 3 षटकार ठोकले. त्याच्याशिवाय डेव्हिड मिलरने 25 चेंडूत 34 धावा केल्या, तर राशिद खानने 6 चेंडूत 19 धावा केल्या.

न्यूज अनकट प्रतिनिधी: ईश्वर वाघमारे