शाहजहांपूर हद्दीत घुसणार्‍या शेतकऱ्यांवर लाठीचार्ज, टीअर बॉम्ब

अलवर, ४ जानेवारी २०२१: कृषी कायद्याविरोधात शेतकर्‍यांचे आंदोलन महिनाभरानंतरही सुरू आहे. रविवारी अलवर जिल्ह्यातील शाहजहांपूर हरियाणा सीमेवर तणावाचे वातावरण पाहून निषेध करणारे शेतकरी आणि हरियाणा पोलिस यांच्यात हिंसक वाद झाला. हरियाणा पोलिस प्रशासन आणि शेतकरी आंदोलनकर्त्यांमध्ये हाणामारी इतकी वाढली की परिस्थिती नियंत्रित करण्यासाठी पोलिसांना शेतकऱ्यांवर लाठीमार करावा लागला. एवढेच नव्हे तर हरियाणा पोलिसांनी त्यांना रोखण्यासाठी टीअर्स बॉम्ब सोडले.

महामार्गावर शेतकरी आणि पोलिस यांच्यात झालेल्या चकमकीनंतर पाच किलोमीटर पर्यंत वाहनांची कोंडी झाली होती. सध्या हरियाणामधील धारुहेरा जवळ सर्व आंदोलक शेतकर्‍यांना थांबविण्यात आले आहे.

हे सर्व शेतकरी दिल्लीत सुरू असलेल्या आंदोलनाला पाठिंबा देण्यासाठी निघाले होते. त्यांना हरियाणामार्गे दिल्ली गाठायचे होते. पण हरियाणा पोलिसांनी त्यांना रोखले आहे.

यापूर्वी गुरुवारी राजस्थानमधील शेतकर्‍यांच्या गटाने शाहजहांपूर येथील राजस्थान-हरियाणाच्या हद्दीत जबरदस्तीने प्रवेश करण्याचा प्रयत्न केला. हरियाणा पोलिसांनी लावलेले बॅरिकेड्स तोडत सुमारे एक डझन ट्रॅक्टर आत शिरले आणि ते दिल्लीला रवाना झाले.

शेतकरी आणि पोलिस यांच्यातील संघर्षाच्या वेळी पोलिसांनी शेतकऱ्यांना रोखण्यासाठी टीअर बॉम्ब व वॉटर गन वापरल्या. तथापि, याचा आंदोलक शेतकर्‍यांवर काही परिणाम झाला नाही.

न्यूज अनकट प्रतिनिधी: ईश्वर वाघमारे