पुणे, १ मार्च २०२३ : लम्पी स्कीनच्या उपचारासाठी प्रभावी असलेल्या लसींचे उत्पादन आता पुण्यातच सुरू होणार आहे. येत्या नोव्हेंबरपासून पुण्यातील पुशवैद्यकीय जैवपदार्थ निर्मित संस्थेकडून लम्पी लस प्रतिबंधक लसीचे उत्पादन केले जाणार आहे. पुण्यातील पुशवैद्यकीय जैवपदार्थ निर्मित संस्थेने लम्पी लस तयार करण्याचे तंत्रज्ञान करारद्वारे घेतले आहे. त्यासाठी महाराष्ट्र शासनाकडून १ कोटी १८ लाख रुपये देण्यात आल्याचे सांगण्यात आले आहे.
लम्पीच्या लसीचे उत्पादन करणारी महाराष्ट्रातील ही पहिलीच संस्था असणार आहे. आयव्हीबीपी संस्थेच्या कर्मचाऱ्यांना लस तयार करण्यासंदर्भात नुकतेच प्रशिक्षण देण्यात आले आहे; तसेच केंद्राकडे नमुना चाचणीसाठी परवानगी मागितली आहे. लवकरच त्याला मान्यता मिळणार असून, त्यानंतर लम्पीबाधित जनावरांवर त्यांचा वापर करण्यात येणार आहे. याबाबत नोव्हेंबरपर्यंत लस निर्मितीसाठी केंद्राकडून मंजुरी मिळण्याची शक्यता आहे.
पशुसंवर्धन विभागाचे उपआयुक्त डॉ. संतोष पंचपोर म्हणाले की, राज्याला आवश्यक असणाऱ्या लसीचे दोन कोटी डोस उपलब्ध करून देण्यात येणार आहेत. महत्त्वाचे म्हणजे इतर राज्यांना या लसीचा पुरवठा करता येऊ शकतो. शासकीय संस्थेमार्फत लस निर्मित करणारे महाराष्ट्र हे पहिलेच राज्य असल्याचे डॉ. पंचपोर यांनी सांगितले आहे.
‘न्यूज अनकट’ प्रतिनिधी : अमोल बारवकर
