पिंपरी : ड्रेनेज लाईनचे काम करत असताना मातीचा ढिगारा अंगावर पडून खड्ड्यात गाडल्या गेलेल्या मजुराचा मृत्यू झाला तर त्याला वाचवण्यासाठी गेलेल्या अग्निशमन दलाच्या जवानालाही यात आपले प्राण गमवावे लागले. पुण्यात पिंपरी चिंचवड शहरातील दापोडी भागात हा दुर्दैवी प्रकार घडला.
याबाबत अधिक माहिती अशी की, ड्रेनेज लाईनचे काम करत असताना अचानक मातीचा ढिगारा अंगावर पडल्याने तीन मजूर पंधरा ते वीस फूट खोल खड्डयात अडकले होते. त्यापैकी दोघा मजुरांना बाहेर काढण्यात आले . मात्र २२ वर्षीय नागराज जमादार या मजुराचा गुदमरून मृत्यू झाला.
त्याच ही घटना घडत असताना पिंपरी चिंचवड महापालिकेतील विशाल जाधव या अग्निशमन दलाच्या जवानाने त्या मजुराला बचावासाठी गेला परंतु त्या बचावकार्यादरम्यान त्यालाही आपले प्राण गमवावे लागले आहेत.
निखिल गोगावले, सरोज पुंड हे जवान आणि ईश्वर बडगे, सीताराम सुरवसे हे मजूर जखमी झाले आहेत.
दरम्यान, एनडीआरएफ, अग्निशमन दल, आणि पोलिसांना तब्बल बारा तासांच्या परिश्रमाननंतर मजुराचा मृतदेह बाहेर काढता आला. रविवारी (दि.१) रोजी संध्याकाळी पावणेसहाच्या सुमारास ही घटना घडली.
