मी, योगी आदित्यनाथ, ईश्वर साक्ष शपथ घेतो की… योगी २.० यूपीमध्ये सुरू

लखनऊ, २६ मार्च २०२२ : एकना स्टेडियमवर योगी आदित्यनाथ यांनी आज पुन्हा उत्तर प्रदेशच्या मुख्यमंत्रीपदाची सूत्रे हाती घेतली. या शपथविधी सोहळ्याला पंतप्रधान नरेंद्र मोदींसह सर्व बडे नेते उपस्थित होते. योगी मंत्रिमंडळात मुख्यमंत्री आणि उपमुख्यमंत्र्यांसह ५३ दिग्गज आहेत. उत्तर प्रदेशच्या राजकारणातील अनेक समज मोडीत काढत योगी आदित्यनाथ यांनी सलग दुसऱ्यांदा उत्तर प्रदेशची कमान हाती घेतली आहे.

गोरक्षपीठाधिश्वर महंत योगी आदित्यनाथ यांनी उत्तर प्रदेशचा राजकीय इतिहास बदलून टाकला आहे. यूपीमध्ये ३५ वर्षांनंतर एका पक्षाला सलग दुसऱ्यांदा बहुमत मिळाले आहे.

राज्यपाल आनंदीबेन पटेल यांनी योगी आदित्यनाथ यांना मुख्यमंत्रिपदाची शपथ दिली, तर केशव प्रसाद मौर्य आणि ब्रजेश पाठक यांनी उपमुख्यमंत्रीपदाची शपथ घेतली. याशिवाय उपमुख्यमंत्री, १६ कॅबिनेट मंत्री, १४ राज्यमंत्री (स्वतंत्र प्रभार) आणि २० राज्यमंत्री करण्यात आले आहेत. निवर्तमान उपमुख्यमंत्री दिनेश शर्मा, श्रीकांत शर्मा, सिद्धार्थनाथ सिंह, मुकुट बिहारी वर्मा यांना मंत्रिमंडळात स्थान देण्यात आलेले नाही.

त्याचवेळी, मोहसिन रझा यांना यावेळी कार्यमुक्त करण्यात आले असून त्यांच्या जागी योगी मंत्रिमंडळातील मुस्लिम चेहरा दानिश आझाद यांची निवड करण्यात आली आहे. दानिश आझाद, बलिया जिल्ह्यातील बांसडीह विधानसभेतील अपायल गावचे रहिवासी, उत्तर प्रदेशातील भारतीय जनता पार्टी अल्पसंख्याक मोर्चाचे राज्य सरचिटणीस आहेत. आझाद हे यूपी सरकारच्या उर्दू भाषा समितीचे सदस्यही आहेत. लखनौ विद्यापीठात शिकलेले दानिश आझाद अन्सारी हे विद्यार्थीदशेतच अखिल भारतीय विद्यार्थी परिषदेत (ABVP) सामील झाले होते.

योगी २.० मध्ये कोणाला स्थान मिळाले

मुख्यमंत्री– योगी आदित्यनाथ

उपमुख्यमंत्री– केशवप्रसाद मौर्य आणि ब्रजेश पाठक

कॅबिनेट मंत्री– सूर्य प्रताप शाही, सुरेश कुमार खन्ना, स्वतंत्र देव सिंह, बेबी राणी मौर्य, लक्ष्मी नारायण चौधरी, जयवीर सिंग, धरमपाल सिंह, नंद गोपाल गुप्ता नंदी, भूपेंद्र सिंह चौधरी, अनिल राजभर, जितिन प्रसाद, राकेश सचान, अरविंद कुमार शर्मा योगेंद्र उपाध्याय, आशिष पटेल, संजय निषाद

राज्यमंत्री (स्वतंत्र प्रभार) – नितीन अग्रवाल, कपिल देव अग्रवाल, रवींद्र जैस्वाल, संदीप सिंग, गुलाब देवी, गिरीश चंद्र यादव, धरमवीर प्रजापती, असीम अरुण, जेपीएस राठोड, दयाशंकर सिंग, नरेंद्र कश्यप, दिनेश प्रताप सिंह, अरुण कुमार सक्सेना , दयाशंकर मिश्र दयालू

राज्यमंत्री – मयंकेश्वर सिंह, दिनेश खाटिक, संजीव गौर, बलदेव सिंग ओलख, अजित पाल, जसवंत सैनी, रामकेश निषाद, मनोहर लाल मन्नू कोरी, संजय गंगवार, ब्रिजेश सिंह, केपी मलिक, सुरेश राही, सोमेंद्र तोमर, अनूप प्रधान, प्रतिभा शुक्ला, राकेश राठौर, रजनी तिवारी, सतीश शर्मा, दानिश आझाद अन्सारी, विजय लक्ष्मी गौतम

योगी आदित्यनाथ यांचा राजकीय प्रवास

१९९८ च्या लोकसभा निवडणुकीत गोरखपूर लोकसभा मतदारसंघातून योगी आदित्यनाथ भारतीय जनता पक्षाच्या (भाजप) तिकिटावर पहिल्यांदा खासदार म्हणून निवडून आले. त्यावेळी योगी आदित्यनाथ हे सर्वात तरुण खासदार होते. त्यानंतर १९९९, २००४, २००९ आणि २०१४ च्या लोकसभा निवडणुकीत ते गोरखपूर लोकसभा मतदारसंघातून खासदार म्हणून निवडून येत राहिले. १२ सप्टेंबर २०१४ रोजी महंत अवैद्यनाथ यांच्या निधनानंतर योगी आदित्यनाथ गोरखनाथ मंदिराचे महंत बनले. यूपी विधानसभेच्या २०१७ च्या निवडणुकीत भाजपला पूर्ण बहुमत मिळाले, त्यानंतर योगी आदित्यनाथ मुख्यमंत्री झाले.

न्यूज अनकट प्रतिनिधी : ईश्वर वाघमारे