Shivshahi was transformed into ‘Hirkani: वातानुकूलित शिवशाही बसेस आता निमआराम हिरकणी बसच्या नव्या रूपात प्रवाशांच्या सेवेत रुजू होणार आहेत. महाराष्ट्र राज्य मार्ग परिवहन महामंडळाने (एसटी) दापोडी येथील मध्यवर्ती कार्यशाळेत हा यशस्वी प्रयोग पूर्ण केला आहे. लवकरच ही आधुनिक हिरकणी बस प्रवासी सेवेत दाखल होईल,
ज्यामुळे प्रवाशांना एक नवा आणि आरामदायी प्रवासाचा अनुभव मिळणार आहे. एसटीने ताफ्यातील सर्व शिवशाही बसेसचे टप्प्याटप्प्याने हिरकणी बसमध्ये रूपांतर करण्याचा महत्त्वाकांक्षी निर्णय घेतला आहे. दापोडीतील कार्यशाळेत दोन शिवशाही बसेसचे हिरकणीत रूपांतर झाले आहे, तर छत्रपती संभाजीनगर येथील चिकलठाणा कार्यशाळेतही हे काम युद्धपातळीवर सुरू आहे. हा बदल प्रवाशांसाठी अधिक सोयीस्कर आणि परवडणारा ठरणार आहे.
नव्या बदलांमध्ये, शिवशाहीची ४३ प्रवासी संख्या तशीच राहील, मात्र वातानुकूलित यंत्रणा नसेल. त्याऐवजी सरकणाऱ्या काचा असतील, ज्यामुळे प्रवासात ताजी हवा उपलब्ध होईल. तसेच, प्रवाशांच्या सोयीसाठी मागे झुकणारी (reclining) आरामदायी नवीन आसने बसवण्यात येत आहेत. बाहेरील रंगातही बदल करण्यात आला असून, हिरवा, पांढरा रंग आणि त्यावर निळे पट्टे असलेली आकर्षक रंगसंगती ही नव्या हिरकणीची ओळख असेल.
दापोडीतील कार्यशाळेत रूपांतरित झालेली पहिली हिरकणी बस मुंबईतील एसटीच्या मुख्य कार्यालयात पाठवण्यात आली आहे. महामंडळाची मान्यता मिळाल्यास, दापोडी येथील मध्यवर्ती कार्यशाळेत तब्बल १०० शिवशाही बसेसचे हिरकणीमध्ये रूपांतर करण्यात येणार आहे. एसटीचा हा अभिनव प्रयोग निश्चितच प्रवाशांना नवीन आणि आधुनिक प्रवासाचा अनुभव देईल अशी अपेक्षा आहे.
न्यूज अनकट प्रतिनिधी; सोनाली तांबे
