नाशिक–पुणे दरम्यान २३२ किलोमीटरचा सेमी हायस्पीड रेल्वे मार्ग केंद्र व राज्य सरकारच्या संयुक्त निधीतून उभारला जाणार आहे. अनेक अडथळे पार करून रेल्वेमंत्री अश्विनी वैष्णव यांनी प्रकल्पाला तत्त्वतः मान्यता दिली; तरीही प्रत्यक्ष अंमलबजावणी अद्याप सुरू झालेली नाही. महारेल आणि मध्य रेल्वे या प्रकल्पाबाबत फारसे उत्सुक दिसत नाहीत, असे राज्याचे अर्थमंत्री अजित पवार यांनी व्हिडीओ कॉन्फरन्सच्या माध्यमातून स्पष्ट केले.
पुणे–मुंबई आणि नाशिक–मुंबई रेल्वे मार्ग अनेक वर्षांपासून कार्यरत असतानाही पुणे–नाशिक मार्ग रहिवाशांसाठी अद्याप दिवास्वप्न राहिलेला आहे. या महत्त्वाकांक्षी प्रकल्पासाठी अंदाजे १६,०३९ कोटी रुपये खर्च अपेक्षित असून, आतापर्यंत ४५ हेक्टर जमीन भुसंपादन केले गेले आहे. मात्र, महारेलने प्रस्तावित मार्ग व्यवहार्य न ठरण्याचे कारण देऊन भुसंपादन थांबविले, ज्यामुळे प्रकल्पाची गती मंदावली आहे.
खोडद येथील जायंट मीटरवेव्ह रेडिओ टेलिस्कोप केंद्राजवळून मार्ग जाणे सुरक्षेच्या दृष्टीने धोकादायक असल्यामुळे शिर्डीमार्गे मार्ग बदलण्याचे विचार सुरू आहेत. या बदलामुळे अंतर ८० किलोमीटरने वाढून ३१५ किलोमीटर होऊ शकते. मात्र, काही तज्ज्ञ संगमनेर मार्गेच रेल्वेमार्ग ठेवावा अशी मागणी करत आहेत. आर्थिक व सुरक्षा अडचणींमुळे नाशिक–पुणे सेमी हायस्पीड रेल्वे प्रकल्पाच्या भविष्यातील स्थितीवर प्रश्नचिन्ह निर्माण झाले आहे.
न्यूज अनकट प्रतिनिधी ध्रुव पाटील
