नाशिक : नाशिकच्या महापौरपदी भाजपचे सतीश कुलकर्णी यांनी बिनविरोध निवड करण्यात आली आहे. या निवडणुकीत अनोखे चित्र बघायला मिळाले. भाजपचे संकटमोचक म्हणून ओळख असलेले गिरीश महाजन यांनी पुन्हा पक्षाला संकटातून तारत महापौरपद राखण्यास मदत केली.
नाशिकमध्ये महाविकासआघाडीत पहिल्याच निवडणुकीत ‘महा’फूट पडल्याचं पाहायला मिळाले. शिवसेनेला मतदान करण्याचा व्हीप बजावूनही काँग्रेसचे नगरसेवक भाजपच्या गळाला लागले. काँग्रेस, राष्ट्रवादी, शिवसेनेने निवडणुकीतून माघार घेतली. सतीश कुलकर्णी हे नाशिकचे १६ वे महापौर ठरले आहेत. नाशिक महापालिकेत भाजपला स्पष्ट बहुमत आहे.
मात्र महापौरपदाच्या निवडणुकीत काही नगरसेवकांची फोडाफोडी होऊ शकते. या भीतीने पक्षाने आपले नगरसेवक अज्ञातस्थळी नेले होते. मात्र सात नगरसेवकांनी या सहलीला जाण्यास नकार दिल्याने मोठी खळबळ उडाली होती. हे नगरसेवक भाजपमधून राष्ट्रवादीमार्गे शिवसेनेत गेलेल्या बाळासाहेब सानप यांचे समर्थक असल्याची चर्चा होती.
नगरसेवकांची फोडाफोडी रोखण्यात महाजनांना यश आल्यामुळे भाजपला महापौरपद कायम राखण्यात यश आलं. रंजना भानसी यांच्याकडे आतापर्यंत महापौरपदाची धुरा होती.
नाशिक महापौरपदाच्या निवडणुकीपूर्वी भाजप आणि मनसे यांची गुप्त बैठक पार पडली होती.
