नागपूर, २५ मे २०२३ : केंद्रीय मंत्री नितीन गडकरी यांना देण्यात आलेल्या धमकी प्रकरणात राष्ट्रीय तपास संस्थेने (NIA) तपास सुरु केला आहे. यासाठी एनआयएचे पथक नागपूरला दाखल झाले आहे. केंद्रीय मंत्री नितीन गडकरी यांना फोनवरून जीवे मारण्याची धमकी देण्यात आली होती. तसेच त्यांच्याकडून १०० कोटींची खंडणी देखील मागण्यात आली होती. याप्रकरणी पोलिसांनी जयेश पुजारी याला ताब्यात घेतले आहे. त्याला NIA ताब्यात घेण्याची शक्यता व्यक्त केली जात आहे.
नितीन गडकरी धमकी प्रकरणात NIA चे दोन DIG स्तरावरील अधिकारी नागपुरात दाखल झाले असून, त्यांनी नागपूर पोलिसांच्या अधिकाऱ्यांची बैठक घेतली. या प्रकरणी आरोपी जयेश पुजारी नागपूर पोलिसांच्या ताब्यात असून, आता त्याला NIA ताब्यात घेण्याची शक्यता आहे.
याप्रकरणी नागपूर पोलिसांनी जयेश पुजारी याला बेळगाव कारागृहातून अटक केली होती. बेळगाव कारागृहातूनच त्याने फोन केल्याचा पुरावा मिळाल्यानंतर त्याला अटक करण्यात आली. तसेच नागपूर पोलिसांच्या तपासात जयेश पुजारीचे दहशतवादी संघटनांशी संबंध असल्याचे पुरावे मिळाले आहेत. त्यानंतर हे प्रकरण एनआयएकडे सोपवण्यात आले आहे.
NIA ने नितीन गडकरी यांना धमकावल्याबद्दल बेंगळुरूमध्ये गुन्हा दाखल केला होता. ज्या दिवशी पुजारीने गडकरींच्या नागपुर मधील जनसंपर्क कार्यालयात धमकीचा फोन केला, यात त्याने १०० कोटी रुपयांची मागणी केली होती आणि दाऊद इब्राहिम टोळीचा सदस्य असल्याचा दावा केला होता. आता जयेश पुजारी याचे लष्कर-ए-तैयबा आणि अंडरवर्ल्डशी संबंध असल्याची चौकशी एनआयए पथक करणार आहे.
न्यूज अनकट प्रतिनिधी – अनिल खळदकर
