आता विजयवाड्यात इलेक्ट्रिक स्कूटरच्या बॅटरीचा स्फोट, आणखी एकाला गमवावा लागला आपला जीव

विजयवाडा, 25 एप्रिल 2022: इलेक्ट्रिक स्कूटरशी संबंधित अपघात कमी होण्याचे नाव घेत नाहीत. आता आंध्र प्रदेशातील विजयवाडा येथे इलेक्ट्रिक स्कूटरच्या बॅटरीमध्ये झालेल्या स्फोटामुळे एका 40 वर्षीय व्यक्तीला आपला जीव गमवावा लागला आहे. त्याचवेळी कुटुंबातील अन्य तीन जण गंभीर जखमी झाले. स्कूटर खरेदी केल्यानंतर अवघ्या एका दिवसात हा अपघात झाला. या घटनेबाबत पोलिसांनी गुन्हा दाखल केला आहे.

जाणून घ्या संपूर्ण प्रकरण

डीटीपी डिझायनर के शिव कुमार असे मृताचे नाव असल्याचे पोलिसांनी सांगितले. पोलिसांनी दिलेल्या माहितीनुसार, कुटुंबाने 22 एप्रिल रोजी बूम कॉर्बेट 14 इलेक्ट्रिक स्कूटर 70 हजार रुपयांना विकत घेतली होती. घराबाहेर इलेक्ट्रिक सॉकेट नसल्याने शिवकुमारने घरीच बॅटरी चार्ज केली. 23 एप्रिल रोजी पहाटे 3.30 वाजता घरी चार्जिंग करत असताना बॅटरीचा स्फोट झाल्याने हा अपघात झाला.

वेंटिलेशनचा होता अभाव

लिव्हिंग रूममध्ये बॅटरीचा स्फोट झाल्याने आग लागल्याचे पोलिसांनी सांगितले. यानंतर आगीपासून वाचण्यासाठी कुटुंबीय स्वयंपाकघराकडे धावले. मात्र, घरात वायुवीजनाची व्यवस्था नव्हती. अशा स्थितीत घरातून धूर निघायला जागा नव्हती. पोलिसांनी दिलेल्या माहितीनुसार, या घटनेत कुटुंबातील सर्व सदस्य आगीच्या स्थानी आले आणि त्यांचा श्वास गुदमरला. रुग्णालयात नेत असताना शिवकुमारचा मृत्यू झाला, तर पत्नी आणि दोन मुली जखमी झाल्या.

Boom Motorsच्या डीलरला पाठवली नोटीस

मीडिया रिपोर्ट्सनुसार, या प्रकरणी स्कूटर विकणाऱ्या Boom Motorsच्या संबंधित डीलरला नोटीस पाठवण्यात आली आहे. तपासादरम्यान गरज पडल्यास पोलीस कंपनीच्या अधिकाऱ्यांनाही बोलावू शकतात.

यापूर्वीही असे प्रकरण समोर आले आहे

यापूर्वी तामिळनाडूतील वेल्लोरमध्ये काही दिवसांपूर्वी इलेक्ट्रिक स्कूटरची बॅटरी चार्जिंग करताना स्फोट झाला होता. यामध्ये वडील आणि मुलीचा मृत्यू झाला होता. मात्र, या घटनेच्या तपासात त्याने वाहन चार्ज करण्यासाठी चार्जर जुन्या सॉकेटमध्ये ठेवल्याचे समोर आले आहे. त्यामुळे शॉर्टसर्किट होऊन बॅटरीचा स्फोट झाला.

न्यूज अनकट प्रतिनिधी: ईश्वर वाघमारे