आता एटीएममधून कार्डशिवाय ‘फ्री’ पैसे काढता येणार, आरबीआयचा हा नवा नियम लागू झाला आहे

पुणे, 20 मे 2022: जर तुम्ही घराबाहेर पडला असाल, पण तुमचे एटीएम कार्ड सोबत आणायला विसरलात. तरीही तुम्हाला घाबरण्याची गरज नाही, कारण आता तुम्ही कार्डशिवायही एटीएम मशीनमधून पैसे काढू शकणार आहात. यासाठी आरबीआयने नियम अधिसूचित केले आहेत.

प्रत्येक एटीएमवर कार्ड-लेस कॅश सुविधा

रिझर्व्ह बँक ऑफ इंडियाने आपल्या अधिसूचनेत म्हटले आहे की देशातील सर्व बँका आणि एटीएम मशीन ऑपरेटरना कार्डशिवाय पैसे काढण्याची सुविधा द्यावी लागेल. सध्या देशातील काही बँका त्यांच्या बँकेच्या एटीएम मशीनमधून कार्ड-लेस कॅश काढण्याची सुविधा देतात. यामध्ये आयसीआयसीआय बँक आणि एचडीएफसी बँक आघाडीवर आहेत.

बँकांची ही सेवा सध्या केवळ ऑन-एंड-ऑन बेसवर उपलब्ध आहे. यामध्ये बँकेचे ग्राहक त्यांच्या स्वत:च्या बँकेच्या एटीएम मशीनवरून या सेवेचा लाभ घेऊ शकतात. आरबीआयच्या या नवीन नियमाच्या अंमलबजावणीनंतर आता ही सेवा देशातील सर्व बँका आणि एटीएम मशीनवर इंटरऑपरेबल होणार आहे. याचा अर्थ असा की तुम्ही एसबीआय किंवा एचडीएफसी बँकेचे ग्राहक असाल, तुम्ही कार्डशिवाय कोणत्याही बँकेच्या एटीएममधून पैसे काढू शकाल.

UPI एटीएम मशीनवर काम करेल

UPI ने भारतात कॅशलेस व्यवहारांना चालना देण्यासाठी स्वतःचे स्थान निर्माण केले आहे. त्याची योग्यता सिद्ध झाली आहे आणि बाजारात यासारखा स्वस्त डिजिटल व्यवहार पर्याय नाही. आता हे UPI तुम्हाला कार्डशिवाय एटीएम मशीनमधून पैसे काढण्यासही मदत करेल.

खरं तर, RBI ने सर्व बँका आणि ATM ऑपरेटरना कार्ड-लेस कॅश सुविधा लागू करण्यासाठी त्यांची ATM मशीन UPI ​​सोबत एकत्रित करण्यास सांगितले आहे. यासाठी नॅशनल पेमेंट्स कॉर्पोरेशन ऑफ इंडियाला (NPCI) सूचनाही देण्यात आल्या आहेत. अशा व्यवहारांमध्ये, UPI ग्राहकाची ओळख सुनिश्चित करेल. तर सेटलमेंट एटीएम नेटवर्क किंवा नॅशनल फायनान्स स्विचद्वारे केले जाईल.

कार्ड लेस कॅश व्यवहार मोफत असतील

आरबीआयने आपल्या मार्गदर्शक तत्त्वांमध्ये स्पष्ट केले आहे की कार्ड-लेस मोडद्वारे केलेले सर्व व्यवहार शुल्कमुक्त असतील. तथापि, एटीएममधून पैसे काढण्याचे नियम सामान्य कार्डमधून पैसे काढण्यासारखेच राहतील. म्हणजेच तुमच्या बँकेने एटीएममधून पैसे काढण्याची मर्यादा तशीच ठेवली आहे.

एटीएममधून होणारी फसवणूक थांबेल

आरबीआयचे गव्हर्नर शक्तीकांत दास यांनी एप्रिलमध्ये चलनविषयक धोरणाच्या आढाव्यादरम्यान या सुविधेबद्दल सांगितले होते की, ही सेवा ग्राहकांच्या सोयीचा विस्तार करेल. तसेच एटीएममध्ये फसवणुकीच्या घटना कमी होतील. यामुळे कार्ड क्लोनिंग, स्किमिंग, एटीएम मशिनशी छेडछाड इत्यादी गोष्टींनाही आळा बसेल.

न्यूज अनकट प्रतिनिधी: ईश्वर वाघमारे