आता महागाई काही दिवसांची पाहुणी, आरबीआय गव्हर्नरांनी केला हा मोठा दावा

नवी दिल्ली, 10 जुलै 2022: महागाईने त्रस्त असलेल्या लोकांना येत्या काही महिन्यांत मोठा दिलासा मिळू शकतो. रिझर्व्ह बँक ऑफ इंडियाचे (RBI) गव्हर्नर शक्तीकांत दास म्हणतात की आर्थिक वर्ष 2022-23 च्या दुसऱ्या सहामाहीपासून (ऑक्टोबर ते मार्च दरम्यान) महागाईचा दर कमी होण्याची अपेक्षा आहे. ते म्हणाले की, चलनवाढ नियंत्रित करण्यासाठी मध्यवर्ती बँक सर्व प्रकारच्या आर्थिक उपाययोजना करत राहील. तूर्तास, वाढीच्या संदर्भात चांगली चिन्हे आहेत.

महागाई हळूहळू कमी होईल

कौटिल्य इकॉनॉमिक कॉन्फरन्समध्ये बोलताना दास म्हणाले की, सध्या पुरवठ्याचा दृष्टीकोन खूपच चांगला दिसत आहे. सर्व निर्देशक 2022-23 च्या उत्तरार्धात अर्थव्यवस्थेच्या रिकव्हरीचे संकेत देत आहेत. आपली सध्याची महागाई हळूहळू कमी होऊ शकते असे आमचे आकलन आहे. त्यामुळे भारतीय अर्थव्यवस्थेला धक्का बसण्याची शक्यता कमी होईल.

जगभर वाढत आहे महागाई

पीटीआयच्या बातमीनुसार, दास म्हणाले की, ही अशी वेळ आहे जेव्हा संपूर्ण जग महागाई दरात वाढ पाहत आहे. त्याच वेळी, जागतिक व्यापारात घट झाली आहे. काही काळासाठी, चलनवाढीचा प्रभाव त्या गोष्टींवर होऊ शकतो, ज्या नियंत्रणाबाहेर आहेत. ते म्हणाले की, देशाच्या अर्थव्यवस्थेत स्थैर्य राखण्यासाठी रिझर्व्ह बँक आपले धोरण बदलत राहील.

रेपो दरात वाढ

कोरोना महामारीमुळे भारतीय अर्थव्यवस्थेची स्थिती दयनीय झाली आहे. मात्र, त्यात हळूहळू रिकव्हरीची नोंद होत आहे. पण महागाईचा दर अजूनही आरबीआयने ठरवलेल्या लक्ष्यापेक्षा जास्त आहे. महागाई नियंत्रणात ठेवण्यासाठी केंद्रीय बँकेने रेपो दरात वाढ करण्यास सुरुवात केली आहे. जून महिन्यातच रेपो दरात वाढ करण्यात आली होती. यानंतर देशातील जवळपास सर्वच बँकांनी कर्जावरील व्याजदरात वाढ केली होती. जूनमध्ये रेपो रेट 0.50 टक्क्यांनी वाढल्यानंतर तो 4.90 टक्के झाला आहे.

महागाई दर

दास म्हणाले की, चलनविषयक धोरण समितीने (MPC) एप्रिल आणि जूनच्या बैठकीत 2022-23 साठी महागाई दर 6.7 टक्क्यांवर सुधारला आहे. मे महिन्यात घाऊक महागाईचा दर 15.88 टक्के होता. त्याच वेळी, एप्रिल महिन्यात ते 15.08 टक्के होते. 2012 नंतर पहिल्यांदाच महागाईने दर हा स्तर गाठला आहे. मे महिन्यात किरकोळ महागाईचा दर 7.04 टक्के होता.

न्यूज अनकट प्रतिनिधी: ईश्वर वाघमारे