रत्नागिरी, १५ मार्च २०२३ : ‘एकच मिशन-जुनी पेन्शन’ या घोषणेनुसार मंगळवारपासून (ता. १४ मार्च) सरकारी व निमसरकारी कर्मचारी आणि शिक्षकांनी राज्यभर संप पुकारला आहे. या संपात जिल्ह्यातील १५ हजार कर्मचारी सहभागी झाले आहेत. त्यामुळे जिल्ह्यातील सर्व प्रशासकीय कारभार ठप्प झाला आहे.
संपकरी कर्मचाऱ्यांनी जिल्हाधिकारी कार्यालयासमोर एकत्र येत जोरदार घोषणाबाजी केली. जुनी पेन्शन योजना लागू करा, तसेच पीएफआरडीए कायदा रद्द करा, कंत्राटी अंशकालीन रोजंदारी कर्मचाऱ्यांच्या सेवा नियमित करा, सर्व विभागातील सर्व रिक्त पदे भरण्यास तत्काळ मान्यता द्यावी, अनुकंपा तत्त्वावरील नियुक्त्यांना विनाशर्त मान्यता देण्यात यावी, चतुर्थश्रेणी वाहनचालक पदे भरण्यावरील बंदी हटवावी, शिक्षक-शिक्षकेतर पालिका कर्मचाऱ्यांच्या प्रलंबित मागण्या तातडीने मंजूर कराव्यात, कामगार कायद्यातील बदल केलेल्या जाचक अटी तत्काळ रद्द कराव्यात, अशा प्रमुख मागण्यांसाठी राज्य सरकारी कर्मचाऱ्यांनी संप पुकारला आहे. या संपात जिल्ह्यातील १५ ते २० हजार कर्मचारी सहभागी झाले आहेत.
महसूल कर्मचारी, जिल्हा परिषद कर्मचारी, आराेग्य विभागाचे कर्मचारी या संपात उतरल्याने संपूर्ण कामकाज ठप्प झाले आहे. संपामुळे कार्यालयांमध्ये शुकशुकाट पाहायला मिळत हाेता. संपकरी कर्मचाऱ्यांनी रत्नागिरी शहरातील मारुती मंदिर ते जिल्हाधिकारी कार्यालय असा माेर्चा काढला. हा माेर्चा जिल्हाधिकारी कार्यालयाजवळ आल्यानंतर कर्मचारी एकत्र आले व त्यांनी जाेरदार घाेषणाबाजी केली.
एकच मिशन जुनी पेन्शन, कोण म्हणतं देणार नाही, घेतल्याशिवाय राहणार नाही, अशा घोषणा देत कर्मचारी संपात सामील झाले. संपाचा शासकीय कामावर याचा मोठा परिणाम होऊन ती ठप्प झाली. जिल्हाधिकारी कार्यालय, जिल्हा परिषद आदी कार्यालयांमध्ये पूर्णतः शुकशुकाट होता. जिल्हाधिकारी कार्यालयातील काही भागात बंद ठेवण्यात आला होता. ग्रामीण भागातून कामानिमित्त आलेल्या अनेक नागरिकांना रिकाम्या पावलांनी परत जावे लागले. जिल्हाधिकारी कार्यालयासमोर काही काळ वाहतूक कोंडी झाली; परंतु पोलिसांनी त्यावर नियंत्रण मिळविले आणि वाहतूक कोंडी सोडविली. सर्वांना सरसकट जुनी पेन्शन योजना लागू करा या प्रमुख मागणीसह अन्य मागण्यांसाठी जिल्ह्यातील सर्व शासकीय, निमसरकारी कर्मचारी, शिक्षक, शिक्षकेतर कर्मचारी; तसेच अन्य क्षेत्रातील २० हजार कर्मचारी जिल्हाभरात राज्यव्यापी संपामध्ये सहभागी झाले.
सकाळी ११ वा. जिल्हाधिकारी कार्यालयाबाहेर हळूहळू शासकीय कर्मचारी गोळा होत गेले. १२ वाजेपर्यंत ही संख्या काही हजारांत गेली. मोठ्या संख्येने कर्मचारी संपात उतरल्याने जिल्हाधिकारी कार्यालयासमोर मोठी गर्दी झाली. एकच मिशन, जुनी पेन्शन, असा स्लोगन असलेले टी-शर्ट, टोप्या घालून कर्मचारी संपात सामील झाले. जुनी पेन्शन लागू करण्यात यावी, या प्रमुख मागणीसाठी आजपासून हे कर्मचारी बेमुदत संपात उतरले आहेत.
विविध संघटनांच्या पदाधिकाऱ्यांनी २००५ मध्ये बंद झालेली ही जुनी पेन्शन लागू करण्याबाबत आपली मते व्यक्त केली. गर्दी वाढल्याने वाहतूक कोंडी होऊ लागली. अखेर वाहतूक पोलिस, शहर पोलिस आणि स्वयंसेवक यांनी संपकऱ्यांना एका बाजूला करून वाहतूक कोंडी सोडविली. संप यशस्वी करण्यासाठी सर्व संघटनांच्या समन्वयकांची यापूर्वीच बैठक झाली. नियोजनानुसार आजचा संप संघटनांनी शंभर टक्के यशस्वी केला. त्याचप्रमाणे प्रत्येक तालुक्यातील सर्व कर्मचारी तहसीलदार कार्यालयासमोर गोळा होऊन संपात समील झाले.
जिल्हाधिकारी कार्यालयातील प्रथम आणि द्वितीय श्रेणीतील अधिकारी सोडले तर सर्व कर्मचारी या संपात उतरले होते. सामान्य प्रशासन, जिल्हा पुरवठा, चिटणीस शाखा, पालिका विभाग आदी विभाग रिकामे होते. जिल्हा परिषदेमध्येही तीच अवस्था होती. सर्व कार्यालयांमध्ये शुकशुकाट होता. शासकीय कामकाज आज पूर्णतः ठप्प होते. कामानिमित्त आलेल्या अनेक नागरिकांना रिकाम्या हाती परतावे लागले.
‘न्यूज अनकट’ प्रतिनिधी : जमीर खलफे
