जामवाडीजवळ बस-कारच्या अपघातात एकजण ठार ; तर पाचजण जखमी

जालना, १८ एप्रिल २०२३: बस आणि कारची समोरासमोर धडक होऊन झालेल्या अपघातात कारचालक जागीच ठार झाला आहे. तर कारमधील ४ ते ५ जण गंभीर जखमी झाले. त्यांना जिल्हा रुग्णालयात हलविण्यात आले आहे. हा अपघात आज सकाळी साडे अकराच्या सुमारास झाला आहे. जालना ते देऊळगावराजा रस्त्यावरील जामवाडीजवळ झाला. यात कार चालक विजय कौतीकराव जाधव (वय. ३५) हे जागीच ठार झाले आहेत.

याबाबतची माहिती अशी की, अंबड आगाराची अकोलाकडे जाणाऱ्या बसचा (एमएच-०६, एस ८६६८) आणि जाफराबाद कडून जालन्याकडे येणाऱ्या कारची (एमएच-२१, एएक्स-१७९०) जामवाडीजवळ समोरासमोर धडक झाली. अपघातानंतर बस दुभाजकावर जाऊन आदळली.

यावेळी संतप्त नागरिकांनी बसवर दगडफेक करत बसच्या काचा फोडल्या आहेत. या दरम्यान बसचालक तेथून पळून गेला आहे. जालना पोलीस ठाण्यात गुन्हा नोंदविण्यात आला आहे. बस चालकांचा शोध सुरू केला असून पुढील तपास पोलीस करत आहेत.

न्यूज अनकट प्रतिनिधी: अमोल बारवकर