पिंपरी-चिंचवड महापालिकेच्या विविध विभागांमध्ये कार्यरत असलेल्या अधिकारी आणि कर्मचाऱ्यांची पदोन्नतीची प्रतीक्षा अखेर संपली आहे. महापालिका आयुक्त शेखर सिंह यांच्या दौऱ्यामुळे रखडलेल्या २२७ कर्मचाऱ्यांच्या पदस्थापनेचे आदेश काढण्यात आले आहेत. यामुळे पदोन्नतीनंतर नवीन विभाग आणि जबाबदारीची वाट पाहत असलेल्या कर्मचाऱ्यांमध्ये आनंदाचे वातावरण आहे.
राजकीय दबावामुळे निर्णय लांबला
महापालिकेच्या पदोन्नती समितीच्या नुकत्याच झालेल्या बैठकीत, सेवा ज्येष्ठतेनुसार २२७ कर्मचाऱ्यांची पदोन्नती निश्चित करण्यात आली होती. मात्र, कोणत्या कर्मचाऱ्याला कोणत्या विभागात नियुक्ती द्यायची, यावर निर्णय घेणे बाकी होते. या प्रक्रियेत चांगल्या विभागांमध्ये नियुक्ती मिळावी यासाठी अधिकाऱ्यांवर मोठ्या प्रमाणात राजकीय दबाव आणला जात होता. परिणामी, पदस्थापनेचे आदेश काढण्यास विलंब होत होता.
आयुक्त दौऱ्यावरून परतताच आदेश जारी
आयुक्त शेखर सिंह दौऱ्यावरून परत येताच त्यांनी तात्काळ या प्रकरणाकडे लक्ष दिले आणि पदस्थापनेचे आदेश जारी केले. एकाच वेळी २२७ कर्मचाऱ्यांना पदोन्नती मिळाल्याने महापालिकेतील प्रशासकीय कामांना गती मिळण्याची शक्यता आहे. या निर्णयामुळे कर्मचाऱ्यांची उत्सुकता आणि कामाची प्रतीक्षा दोन्ही संपली असून, आता ते नव्या उत्साहात आपल्या नवीन जबाबदाऱ्या स्वीकारण्यास सज्ज झाले आहेत.
न्यूज अनकट प्रतिनिधी सोनाली तांबे
