पिंपरी-चिंचवड महापालिका निवडणुकीच्या पार्श्वभूमीवर प्रसिद्ध झालेल्या प्रभागनिहाय प्रारूप मतदार याद्यांमध्ये मोठ्या प्रमाणात त्रुटी आणि गोंधळ झाल्याचे उघड झाले आहे. माजी नगरसेवकांसह शेकडो मतदारांची नावे यादीतून गायब झाली आहेत, तर अनेकांचे प्रभाग विनाकारण बदलले आहेत. यामुळे नागरिक आणि राजकीय नेते संतप्त झाले असून, पहिल्याच दिवशी १७ हरकती प्राप्त झाल्या आहेत.
माजी नगरसेवक पंकज भालेकर यांचे नाव यादीतून गायब झाल्याचे समोर आले आहे. त्यांनी प्रभाग १२ मधून तब्बल १,२६१ मतदारांची नावे काढल्याचा गंभीर आरोप केला आहे. प्रभाग ८ (बालाजीनगर) मधूनही सुमारे ४,५०० नावे अचानक गायब झाल्याचा आरोप माजी नगरसेविका सीमा सावळे यांनी केला आहे, हा ‘खोडसाळपणा’ असल्याचा त्यांचा दावा आहे.
यादीतील बदलांमुळे मतदारांमध्ये संभ्रमाचे वातावरण आहे. प्रभाग १ मधील पूर्णानगर, कृष्णानगरचे मतदार थेट प्रभाग ११ मध्ये टाकले गेले आहेत. यामुळे प्रभाग १ मधील एकूण मतदारसंख्या ७४,३४० पर्यंत पोहोचल्याची चर्चा आहे. त्याचप्रमाणे, प्रभाग ६ मध्ये मोशी-कुदळवाडी आणि प्रभाग १७ मध्ये प्रभाग १६ मधील मतदारांचा समावेश करण्यात आला आहे.
राष्ट्रवादीचे सरचिटणीस विनायक रणसुभे यांनी ‘जागेवर जाऊन तपासणी न केल्यामुळे हा गोंधळ झाला,’ अशी थेट टीका केली आहे. जागेवर तपासणी न झाल्याने झालेल्या या गोंधळाची गांभीर्याने दखल घेणे गरजेचे आहे.
न्यूज अनकट प्रतिनिधी: सोनाली तांबे
