थंडीच्या दिवसांत नागरिकांच्या पौष्टिक आहाराच्या वाढलेल्या मागणीमुळे सध्या पिंपरीच्या बाजारात फळांना मोठी मागणी आहे. विशेष म्हणजे, बाजारात नागपूरची नारंगी संत्री दाखल झाली असून, त्यामुळे किरकोळ बाजारात १६० रुपये प्रति किलोवर गेलेला संत्रा आता १०० ते १२० रुपये प्रतिकिलोवर आला आहे, ज्यामुळे ग्राहकांना थोडा दिलासा मिळाला आहे.
मात्र, याच वेळी, दैनंदिन वापरातील फळभाज्या आणि पालेभाज्यांनी अक्षरशः भाव खाल्ला आहे. सर्वसामान्य नागरिकांचे आर्थिक गणित पूर्णपणे कोलमडले आहे. शेवगा, तोंडली, वांगी, टोमॅटो, भेंडी, आणि मेथी यांसारख्या भाज्यांचे दर मागील काही दिवसांपासून वाढलेलेच आहेत.
बाजारातील स्थिती पाहता, मागील आठवड्यात २० ते २५ रुपये प्रतिकिलो असलेला टोमॅटो आता थेट ५० ते ६० रुपयांवर पोहोचला आहे. तर, बारामती भागातून आलेल्या वांग्यांना १०० रुपये प्रतिकिलो असा कडाडून दर मिळाला आहे. गवार, मटार, शेवगा आणि तोंडली यांसारख्या भाज्यांनी तर शंभरीचा आकडा पार केला आहे. मटारचे दर तर चक्क २०० ते २४० रुपये प्रतिकिलो आहेत! पालेभाज्यांमध्ये कोथिंबीर आणि पालकाची गड्डी ३० रुपये, तर मेथीची गड्डी ४० रुपयांना विकली जात आहे.
सध्या नागरिकांचा कल पौष्टिक फळांकडे अधिक असल्याने सफरचंद (१२० ते १६० रुपये), डाळिंब (२०० रुपये), आणि पेर (२४० रुपये) यांसारख्या फळांनाही चांगला भाव मिळत आहे.
एकंदरीत, थंडीच्या दिवसांत संत्र्यांनी दिलेला दिलासा वगळता, जीवनावश्यक भाज्यांचे दर वाढल्यामुळे सर्वसामान्यांच्या खिशाला चांगलीच ‘कात्री’ लागली आहे आणि घरातील बजेट सांभाळणे एक मोठे आव्हान बनले आहे.
न्यूज अनकट प्रतिनिधी: सोनाली तांबे
