Pimpri-Chinchwad Bioremediation Project to Clear Moshi Landfill: पिंपरी-चिंचवडकरांसाठी एक दिलासादायक बातमी! शहराच्या वैभवावर डाग ठरलेल्या मोशी कचरा डेपोतील २५ ते ३० वर्षांपासून साचलेल्या कचऱ्याच्या डोंगरांना आता कायमचा निरोप मिळणार आहे. बायोमायनिंग प्रक्रियेद्वारे या कचऱ्याची शास्त्रोक्त पद्धतीने विल्हेवाट लावली जाणार असून, दुसऱ्या टप्प्यातील या महत्त्वाकांक्षी प्रकल्पासाठी १४२.४५ कोटी रुपयांचा खर्च अपेक्षित आहे. महापालिकेच्या अधिकाऱ्यांनी दिलेल्या माहितीनुसार, ऑक्टोबर २०२६ पर्यंत एकूण २०.३५ लाख घनमीटर कचरा हटवून मोशी डेपोतील ८ एकर जागा मोकळी करण्याचा मानस आहे.
शहरातील संपूर्ण कचरा मोशी येथील ८१ एकर जागेत जमा होतो. अनेक वर्षांच्या साठ्यामुळे येथे कचऱ्याचे भलेमोठे डोंगर तयार झाले आहेत. या डोंगरांमुळे परिसरातील पर्यावरणावर आणि नागरिकांच्या आरोग्यावर नकारात्मक परिणाम होत होता. या समस्येवर तोडगा काढण्यासाठी महापालिकेने बायोमायनिंगचा मार्ग स्वीकारला आहे.
बायोमायनिंग म्हणजे नेमकं काय?
बायोमायनिंग म्हणजे अनेक वर्षांपासून कुजलेल्या कचऱ्यातून माती आणि न कुजणारा कचरा वेगळा करण्याची प्रक्रिया. या प्रक्रियेतून तयार होणारी माती खत म्हणून वापरली जाते, तर न कुजणाऱ्या कचऱ्याचा उपयोग खाणी किंवा मोठे खड्डे बुजवून जागा पुन्हा वापरायोग्य बनवण्यासाठी केला जातो. ही प्रक्रिया पर्यावरणासाठी अत्यंत फायदेशीर आहे.
पहिल्या टप्प्यात ४२ कोटी रुपये खर्चून ८ लाख घनमीटर कचऱ्यावर प्रक्रिया करण्यात आली होती. आता दुसऱ्या टप्प्यात १०५ कोटी रुपयांच्या कामाला सुरुवात झाली असून, त्याद्वारे १५ लाख घनमीटर कचरा हटवला जाईल. वाढीव कामामुळे या प्रकल्पाचा खर्च ३७.४५ कोटी रुपयांनी वाढला असला तरी, प्रशासनाने हा खर्च कचऱ्याचे डोंगर लवकरात लवकर नष्ट करण्यासाठी आवश्यक असल्याचा दावा केला आहे. या कामासाठी स्वच्छ भारत अभियान २.० अंतर्गत २७.५० कोटी रुपयांचे अनुदान मिळाले आहे.
गेली तीन वर्षे महापालिकेत प्रशासकीय राजवट असल्याने, या वाढीव खर्चावर काही नागरिकांनी नाराजी व्यक्त केली आहे. मात्र, कचरामुक्त शहराच्या दिशेने टाकलेले हे पाऊल भविष्यासाठी अत्यंत महत्त्वाचे ठरणार आहे. ऑक्टोबर २०२६ पर्यंत हे काम पूर्ण करण्याचे उद्दिष्ट असून, यामुळे मोशी डेपोतील ८ एकर जागा मोकळी होऊन तिथे घनकचरा व्यवस्थापनाशी संबंधित विविध प्रकल्प राबवता येतील. पिंपरी-चिंचवड शहर आता खऱ्या अर्थाने स्वच्छ आणि सुंदर होण्याच्या मार्गावर आहे.
न्यूज अनकट प्रतिनिधी; सोनाली तांबे
