शिंदे-फडणवीस सरकारविरोधात महाविकास आघाडीचा आराखडा तयार; ‘राष्ट्रवादी’च्या नेत्याचे वक्तव्य

मुंबई, १० मार्च २०२३ : शिंदे सरकारच्या वतीने अर्थमंत्री देवेंद्र फडणवीस यांनी गुरुवारी (ता. ९ मार्च) पहिल्यांदाच महाराष्ट्राचा अर्थसंकल्प सादर केला. यानंतर महाविकास आघाडी संबंधित तिन्ही पक्षांच्या (काँग्रेस, राष्ट्रवादी, ठाकरे गट) दिग्गज नेत्यांची महत्त्वपूर्ण बैठक झाली. ‘माविआ’ची ही बैठक विधानपरिषदेचे विरोधी पक्षनेते अंबादास दानवे यांच्या ‘अजिंक्यतारा’ या शासकीय निवासस्थानी झाली. या बैठकीला ठाकरे गटाचे प्रमुख उद्धव ठाकरे, खासदार संजय राऊत, राष्ट्रवादी काँग्रेसचे प्रदेशाध्यक्ष जयंत पाटील, नाना पटोले यांच्यासह अनेक दिग्गज नेते उपस्थित होते. या बैठकीत शिंदे-फडणवीस सरकारच्या विरोधात भविष्यातील मजबूत रणनीती आखण्यावर चर्चा झाली.

जयंत पाटील म्हणाले की, शिंदे-फडणवीस सरकारला आव्हान देण्यासाठी स्वतंत्र बैठका घेण्याऐवजी महाविकास आघाडीच्या संयुक्त बैठका घेण्याचा निर्णय घेण्यात आला. यासंदर्भात १५ तारखेला आणखी एक बैठक होणार असून, त्यात योजनांवर सविस्तर चर्चा होऊन काही ठोस निर्णय घेण्यात येणार आहेत. याबाबत सविस्तर माहिती देताना काँग्रेस प्रदेशाध्यक्ष नाना पटोले म्हणाले की, महाविकास आघाडीची पहिली संयुक्त बैठक ता. २ एप्रिल रोजी छत्रपती संभाजीनगर (पूर्व) येथे होणार आहे.

बैठकीत झालेल्या चर्चेची माहिती देताना जयंत पाटील म्हणाले, ‘महाराष्ट्रात भविष्यात तिन्ही पक्षांच्या एकत्रित बैठका घेण्याचा विचार करण्यात आला. काही दिवसांत महाराष्ट्रभर मोठमोठे मोर्चे काढण्यात येणार आहेत. हे कार्यक्रम कसे, कधी आणि कुठे आयोजित केले जातील, याबाबत सविस्तर चर्चा करण्यासाठी येत्या १५ तारखेला आणखी एक महत्त्वाची बैठक बोलाविण्यात आली आहे.

मात्र, छत्रपती संभाजीनगर येथून सभांना सुरवात होणार आणि त्यानंतर राज्यभरात मोर्चे, सभांचा फेरा सुरू होणार हे निश्चित. संभाजीनगर सभेची जबाबदारी ठाकरे गटाचे अंबादास दानवे आणि राष्ट्रवादीचे सतीश चव्हाण यांच्या खांद्यावर असेल. मराठवाडा सांस्कृतिक क्रीडा मंडळात ही संयुक्त बैठक होणार आहे. म्हणजेच आगामी काळात भाजप आणि शिवसेनेला मोठा धक्का देण्याची पूर्ण तयारी करण्यात आली आहे. याबाबतचा अधिक तपशील १५ तारखेच्या बैठकीनंतर समोर येईल.

‘न्यूज अनकट’ प्रतिनिधी : सूरज गायकवाड