मुंबई, ६ फेब्रुवारी २०२३ : पंतप्रधान नरेंद्र मोदी येत्या १० फेब्रुवारी रोजी मुंबई दौऱ्यावर येणार आहेत. त्याआधी मुंबई पोलिसांनी अलर्ट जारी केला आहे. पंतप्रधान नरेंद्र मोदी १० फेब्रुवारीला छत्रपती शिवाजी टर्मिनल येथे वंदे भारत ट्रेनचे उद्घाटन करणार आहेत.
मिळालेल्या माहितीनुसार, मुंबई पोलिसांनी मरोळ, अंधेरी, कुलाबा, सीएसटी येथे पंतप्रधानांच्या दौऱ्याच्या ठिकाणी ड्रोन, फुगे, पतंग आणि इतर गोष्टींवर बंदी घातली आहे. तसेच मुंबई पोलिसांनी कलम १४४ अंतर्गत हा अलर्ट जारी केला आहे. या दौऱ्याच्या पार्श्वभूमीवर सुरक्षा व्यवस्थेत कोणतीही त्रुटी राहू नये यासाठी मुंबई पोलीस केंद्रीय यंत्रणांसोबत काम करत आहेत.
दरम्यान, मुंबईहून लवकरच दोन नवीन वंदे भारत एक्सप्रेस गाड्या सुरू होणार असून, एक वंदे भारत ट्रेन मुंबई-सोलापूर मार्गावर तर, दुसरी मुंबई-शिर्डी मार्रगावर धावणार आहे. त्याआधी पंतप्रधान नरेंद्र मोदी १० फेब्रुवारी रोजी छत्रपती शिवाजी टर्मिनस येथून दोन्ही वंदे भारत ट्रेनला हिरवा झेंडा दाखवतील. या दोन्ही गाड्या चेन्नईतील इंटिग्रल कोच फॅक्टरीमध्ये तयार करण्यात आल्या आहेत.
- या मार्गावरुन धावणार ‘वंदे भारत’
आठ मार्गांवरून ‘वंदे भारत’ धावणार आहे. यामध्ये दिल्ली-वैष्णो देवी, दिल्ली-वाराणसी, दिल्ली-अंब अंदौरा, गांधीनगर-मुंबई, नागपूर-बिलासपूर, चेन्नई-म्हैसूर, हावडा-न्यू जलपाईगुडी आणि विशाखापट्टणम-सिकंदराबाद या मार्गांचा समावेश आहे.
‘न्यूज अनकट’ प्रतिनिधी : प्रज्ञा फाटक.
