मुंबई ,६ जून २०२३ : वंचित बहुजन आघाडीचे नेते प्रकाश आंबेडकर हे राजकारणाची दिशा भरकटवण्याचा प्रयत्न करत असल्याची टीका उपमुख्यमंत्री देवेंद्र फडणवीस यांनी केली आहे. भीमा-कोरेगाव प्रकरणी तत्कालीन मुख्यमंत्र्यांची साक्ष तपासण्याची परवानगी द्यावी अशी मागणी करणारे पत्र प्रकाश आंबेडकर यांनी लिहीले होते. त्या पार्श्वभूमीवर बोलताना फडणवीस यांनी ही प्रतिक्रिया दिली आहे.मुंबईतील लहान बालकांसांठी किलबिलाट ॲम्ब्युलन्सचे उपमुख्यमंत्री देवेंद्र फडणवीस यांच्या उपस्थितीत उद्घाटन करण्यात आले. त्यावेळी ते प्रसिद्धी माध्यमांशी बोलत होते.
तत्कालीन मुख्यमंत्री देवेंद्र फडणवीस यांची साक्ष तपासण्याची परवानगी द्या, अशी मागणी करणारे पत्र प्रकाश आंबेडकर यांनी भीमा-कोरेगाव चौकशी आयोगाला पाठवले होते. त्यावेळी माजी मुख्य सचिव सुमित मलिक आणि पुण्याचे माजी पोलिस अधिक्षक यांचीसुद्धा विटनेस बॉक्समध्ये साक्ष तपासायची असल्याचे आंबेडकरांनी नमूद केले होते. यावर उपमुख्यमंत्री देवेंद्र फडणवीस यांनी आपली प्रतिक्रिया दिली आहे.
प्रकाश आंबेडकर यांना ५ जून रोजी साक्ष नोंदवण्यासाठी आयोगाने बोलावले होते. त्या पत्राला उत्तर देताना आंबेडकर यांनी पूर्वनियोजित कार्यक्रमामुळे आपण ५ जूनला येऊ शकत नसल्याचे त्यांनी आयोगाला कळवले होते.
यावेळी बोलताना फडणवीस म्हणाले महाराष्ट्रात मोठ्या प्रमाणात परदेशी गुंतवणूक येत आहे. परदेशी गुंतवणूक येण्यात महाराष्ट्र देशात नंबर एक आहे, असे त्यांनी स्पष्ट केले. आमचे सरकार असताना राज्यात गुंतवणूक सर्वात जास्त होती. मात्र आम्ही गेल्यानंतर २०२० ते २०२२ या काळात राज्यात परदेशी गुंतवणूक कमी झाली होती. आता आम्ही पुन्हा आलो आहोत. आमच्या सरकारने महाराष्ट्राला पुन्हा पहिल्या क्रमांकावर आणले आहे. असा, दावाही फडणवीस यांनी केला.दरम्यान राज्यातील जलयुक्त प्रकल्पांना गती मिळणार, असल्याचा विश्वास देखील फडणवीस यांनी व्यक्त केला.
न्यूज अनकट प्रतिनिधी : अनिल खळदकर
