जालना, ३१ जानेवारी २०२४ : जालना जिल्हयात सदानंद महाराज, विश्रांती मठ, नाव्हा/धारकल्याण यांची ११८ वी पुण्यतिथी दि. ७ फेब्रुवारी २०२४ रोजी साजरी होणार आहे. त्या अनुषंगाने ३१ जानेवारी ते ९ फेब्रुवारी पर्यंत यात्रा भरणार असून याला भाविकांची मोठी गर्दी होण्याची शक्यता आहे.
सध्या विविध संघटनांकडून विविध मागण्यांसाठी संभाव्य आंदोलनात्मक कार्यक्रम घेण्याची शक्यता नाकारता येत नाही, त्यामुळे अनुचित प्रकार घडून कायदा व सुव्यवस्थेचा प्रश्न निर्माण होऊ नये म्हणून अपर जिल्हादंडाधिकारी यांनी पोलीस अधिनियम १९५१ चे कलम ३७ (१) व (३) अन्वये प्रतिबंधात्मक आदेश जारी केले आहेत. हा आदेश संपूर्ण जिल्ह्यासाठी दि. ३१ जानेवारी २०२४ रोजीच्या संध्याकाळी ६ वाजेपासुन ते दि. १३ फेब्रुवारी २०२४ ला रात्री १२ वाजेपर्यंत अंमलात राहील. असे आदेशात नमूद करण्यात आले आहे.
त्यामुळे अपर जिल्हादंडाधिकारी जालना यांना प्राप्त अधिकारानुसार पोलीस अधिनियम १९५१ चे कलम ३७ (१) अन्वये शासकीय कर्तव्य पार पडणाऱ्या कर्मचाऱ्यांच्या व्यतिरिक्त इतर कोणतीही व्यक्ती सार्वजनिक ठिकाणी किंवा त्या आसपास शस्त्रे, लाठ्या, सोटे, बंदुके, तलवारी, भाले, चाकू व इतर शरीरास इजा अथवा अपाय करणाऱ्या वस्तू जवळ बाळगणार नाही. तीक्ष्ण पदार्थ अथवा स्फोटके सहज हाताळता येतील अशी घातक वस्तू जवळ बाळगणार नाही. दगड किंवा इतर उपकरणे किंवा प्रवर्तक शस्त्रे गोळा करुन ठेवणार नाही किंवा जवळ बाळगणार नाही. व्यक्तींच्या किंवा समूहाच्या भावना जाणूनबुजून दुखवण्याच्या उद्देशाने असभ्यतेने भाषण करणार नाही, वाद्य वाजविणार नाही, गाणे म्हणणार नाही. व्यक्तींचे किंवा शवाचे किंवा त्याच्या प्रतिकृतीचे प्रदर्शन करणार नाही. आवेषी भाषण, अंगविक्षेप, विडंबनापर नकला करणार नाही आणि सभ्यता किंवा नितिमत्ता यास बाधा येईल किंवा ज्यामुळे राज्याची सुरक्षितता धोक्यात येईल किंवा कोणतीही वस्तू बाळगणार नाही. तसेच अपर जिल्हादंडाधिकारी यांना प्राप्त अधिकारानुसार पोलीस अधिनियम १९५१ चे कलम ३७ (३) अन्वये पाच किंवा अधिक व्यक्तींना जमण्यास किंवा सभा, मिरवणुका, मोर्चा काढण्यास मनाई केली आहे. हा आदेश कामावरील कोणताही अधिकारी किंवा कर्मचारी यांना लागू होणार नाही. तसेच विवाह, अंत्ययात्रा आणि पोलीस अधिक्षक जालना व उपविभागीय पोलीस अधिकारी जालना, अंबड, परतूर, भोकरदन यांनी विशेषरित्या परवानगी दिलेल्या मिरवणुका, सभा, मोर्चा यांना लागू राहणार नाही. असेही आदेशात नमुद करण्यात आले आहे.
न्यूज अनकट प्रतिनिधी : विजय साळी
