रिकाम्या जागेवर नमाज अदा करणाऱ्यांना विरोध, जमावाने दिल्या जय श्री रामच्या घोषणा

गुडगाव, 23 ऑक्टोंबर 2021: हरियाणातील गुडगाव (गुरुग्राम) येथे शुक्रवारी सेक्टर 12-ए येथील मोकळ्या जागेवर नमाज पठणावरून वाद झाला.  असे सांगितले जात आहे की संतप्त जमावाने प्रार्थनेला विरोध केला आणि जय श्री रामच्या घोषणा दिल्या.  या प्रकरणात बजरंग दलाच्या कार्यकर्त्यांचा सहभाग असल्याचा आरोप आहे.

 यापूर्वी, गुरुग्रामच्या सेक्टर 47 मध्ये अशीच एक घटना घडली होती जेव्हा सरकारी जमिनीवर उघड्यावर नमाज पठण बंद करण्याची मागणी करण्यात आली होती.  शुक्रवारी घडलेल्या घटनेचा व्हिडिओही समोर आला आहे.

 यामध्ये मुस्लीम समाजातील लोकांच्या नमाजाच्या तयारीदरम्यान मोठ्या प्रमाणात पोलीस बंदोबस्त पाहायला मिळतो.

व्हिडिओमध्ये 12-13 पोलिस पिवळ्या बॅरिकेडच्या मागे उभे असल्याचे दिसत आहे.  आंदोलक जमावाला ते थांबवत होते.  गर्दीतून ‘जय श्री राम’च्या घोषणा वारंवार दिल्या जात होत्या.  पोलिसांच्या आश्वासनानंतरच जमाव घटनास्थळावरून निघून गेला.

 निदर्शने करणाऱ्यांमध्ये भाजपच्या माजी नेत्यांचाही समावेश

 भाजपच्या एका माजी स्थानिक नेत्यानेही प्रार्थनेला विरोध केल्याची माहिती आहे.  कुलभूषण भारद्वाज हे वकील पोलिसांशी वाद घालताना दिसतात.  भारद्वाज यांनी जामिया-मिलियामधील हिंसाचाराच्या वेळी शूटरचा खटलाही लढवला होता, ज्याचा व्हिडिओ व्हायरल झाला होता.  जातीय भाषण केल्याबद्दल त्याला गुरुग्राम पोलिसांनी अटकही केली होती.

 प्रशासनानेच नमाजसाठी परवानगी दिली होती

जिथे वाद होता ती जागा खुद्द जिल्हा प्रशासनाने नमाजसाठी दिली आहे.  2018 मध्ये अशीच एक घटना उघडकीस आल्यानंतर हिंदू-मुस्लिम यांच्यातील चर्चेनंतर जागा निश्चित करण्यात आल्या होत्या.  एएनआय या वृत्तसंस्थेने गेल्या आठवड्यात एसीपी अमन यादव यांना उद्धृत केले होते की, या प्रकरणी स्थानिक लोकांमध्ये अनेक वेळा चर्चेच्या फेर्‍या झाल्या आहेत परंतु अद्याप कोणताही तोडगा निघालेला नाही.

न्यूज अनकट प्रतिनिधी: ईश्वर वाघमारे