पुण्यात धावणार इलेक्ट्रिक डबलडेकर बस; पीएमपीकडून २५ ई-बस घेण्याचा निर्णय

पुणे महानगर परिवहन महामंडळाकडून (पीएमपी) इलेक्ट्रिक डबलडेकर बसची घेतलेली चाचणी यशस्वी झाली आहे. त्यामुळे ‘पीएमपी’कडून २५ डबलडेकर ई-बस घेण्याचा निर्णय घेण्यात आला आहे. या बस घेण्यास संचालक मंडळाचीही परवानगी मिळाली आहे.

‘पीएमपी’ने इलेक्ट्रिक डबलडेकर बस घेण्यासाठी तिची चाचणी घेण्याचा निर्णय घेतला होता. त्यासाठी पुण्यात सप्टेंबर महिन्यात डबलडेकर दाखल झाली होती. त्यानंतर हिंजवडी, भोसरी, कोरेगाव पार्क, विमाननगर अशा भागांतील पाच मार्गांवर चाचणी घेण्यात आली. दहा दिवस यशस्वी चाचणी घेतल्यानंतर किरकोळ घटना वगळता डबलडेकर बसला काहीही अडचणी आल्या नाहीत.

डबलडेकरची चाचणी यशस्वी झाल्यानंतर आता ‘पीएमपी’ने भाडेतत्त्वावर डबलडेकर बस घेण्याचा निर्णय घेतला. या डबलडेकर बस घेण्यास संचालक मंडळाचीही मान्यता मिळाली आहे. त्यानंतर आता निविदा प्रक्रिया राबविण्यात येणार असून, या बसला चालक आणि वाहक कंत्राटदारांकडून कंपनीकडून पुरवठा करण्यात येणार आहे.

मुंबईत डबलडेकर बस यशस्वीपणे धावत असून, प्रवाशांचा चांगला प्रतिसाद मिळतो आहे. त्याच धर्तीवर पुण्यातही या बस आणण्यासाठी पीएमपी प्रशासनाकडून मागील काही दिवसांपासून प्रयत्न सुरू होते. संपूर्ण वातानुकूलित व इलेक्ट्रिक तंत्रज्ञानावर आधारित असलेली ही बस प्रदूषणमुक्त वाहतुकीकडे महत्त्वाचे पाऊल मानले जात आहे.

पुण्यातील वाढत्या लोकसंख्येमुळे आणि वाहनांच्या संख्येमुळे रस्त्यावरची कोंडी दिवसेंदिवस वाढत आहे. दोन ते तीन महिन्यांत निविदा प्रक्रिया करून जानेवारी महिन्यात या बस दाखल होण्याची शक्यता आहे. त्यामुळे नवीन वर्षात नागरिकांना डबलडेकरमधून प्रवास करता येणार आहे.

डबलडेकर बस शहरातील हिंजवडी फेज ३ ते हिंजवडी फेज ३ (वर्तुळ), रामवाडी मेट्रो स्टेशन ते खराडी, मगरपट्टा सिटी ते कल्याणीनगर मेट्रो स्टेशन, पुणे स्टेशन ते लोहगाव विमानतळ, देहू ते आळंदी आणि चिंचवड ते हिंजवडी या मार्गांवर धावणार आहेत.

डबलडेकर बसची वैशिष्ट्ये:
कंपनी: स्विच मोबिलिटी
प्रवासी क्षमता: ६० (बसून), २५ (उभे) — एकूण ८५ प्रवासी
आकारमान: उंची ४.७५ मीटर, रुंदी २.६ मीटर, लांबी ९.५ मीटर
किंमत: अंदाजे २ कोटी रुपये

न्यूज अनकट प्रतिनिधी ध्रुव पाटील