पुणे महापालिकेत काम करणाऱ्या सुमारे नऊ हजार कंत्राटी कर्मचाऱ्यांसाठी यंदाची दिवाळी आनंदाची ठरणार आहे. प्रशासनाने या कर्मचाऱ्यांना दिवाळी बोनस देण्याचा महत्त्वपूर्ण प्रस्ताव मान्यतेसाठी थेट महापालिका आयुक्तांकडे पाठवला आहे. आयुक्तांकडून लवकरच या प्रस्तावाला हिरवा कंदील मिळण्याची शक्यता आहे, ज्यामुळे कर्मचाऱ्यांच्या अनेक वर्षांच्या मागणीला यश मिळणार आहे.
महापालिकेत घनकचरा व्यवस्थापन, सुरक्षा तसेच आरोग्य, पथ, मिळकतकर विभाग आणि अतिक्रमण विभागासह अन्य विभागांमध्ये हे कंत्राटी सेवक नियमितपणे आपले योगदान देतात. गेल्या अनेक वर्षांपासून हे कर्मचारी दिवाळी बोनस मिळावा यासाठी मागणी करत होते, परंतु त्यांची निराशा होत होती.
यंदा मात्र, महापालिका आयुक्त नवल किशोर राम यांनी स्वतः या मागणीची दखल घेतली. त्यांनी कामगार कल्याण विभागाला कंत्राटी कर्मचाऱ्यांसाठी बोनसचा प्रस्ताव तयार करण्याच्या स्पष्ट सूचना दिल्या होत्या. त्यानुसार, विभागाने आवश्यक माहिती संकलित करून हा प्रस्ताव अंतिम मान्यतेसाठी पाठवला आहे.
आयुक्तांची मंजुरी मिळताच, या हजारो कर्मचाऱ्यांच्या खात्यात दिवाळीपूर्वीच बोनस जमा होईल. या निर्णयामुळे महापालिकेतील कंत्राटी कर्मचाऱ्यांमध्ये उत्साहाचे आणि आनंदाचे वातावरण निर्माण झाले आहे. या बोनसमुळे त्यांची दिवाळी नक्कीच गोड होणार आहे.
न्यूज अनकट प्रतिनिधी: सोनाली तांबे
