PMC : सांस्कृतिक राजधानी म्हणून ओळखल्या जाणाऱ्या पुणे शहराच्या सांस्कृतिक धोरणावरून मोठा वाद निर्माण झाला आहे. पुणे महापालिकेने तयार केलेले महत्त्वाकांक्षी सांस्कृतिक धोरण स्थायी समितीने कायमस्वरूपी रद्द करण्याचा निर्णय घेतला आहे. सल्लागार समितीतील सदस्यांवरून झालेल्या वादानंतर हा निर्णय घेण्यात आला.
धोरणाचे उद्दिष्ट आणि निर्मिती
२०२३-२०२४ मध्ये पुणे महापालिकेने शहरासाठी स्वतंत्र सांस्कृतिक धोरण तयार करण्याचा निर्णय घेतला. या धोरणाचा उद्देश शहरातील सांस्कृतिक वारसा जपणे, कलाकारांना प्रोत्साहन देणे आणि शहराला सांस्कृतिक पर्यटनाचे केंद्र बनवणे हा होता. यासाठी कलाकार, विविध क्षेत्रांतील मान्यवर आणि लोकप्रतिनिधी यांची सल्लागार समिती स्थापन करण्यात आली होती. या समितीने नागरिकांच्या सहभागातून सांस्कृतिक महोत्सव आयोजित करणे, कला केंद्रांना पायाभूत सुविधा देणे, कला प्रदर्शने आणि मैफिलींसाठी व्यासपीठ उपलब्ध करून देणे, पर्यटकांना आकर्षित करून स्थानिक व्यावसायिकांचा आर्थिक विकास साधणे यांसारख्या महत्त्वाच्या सूचना केल्या होत्या.
धोरणाला विरोध आणि रद्द करण्याचा निर्णय
मात्र, सल्लागार समितीतील सदस्यांवरून वाद निर्माण झाल्याने या धोरणाला विरोध होऊ लागला. महापालिकेत अधिकाऱ्यांच्या बदल्या झाल्यानंतर या धोरणाबाबत आयुक्त राजेंद्र भोसले यांच्यासोबत चर्चा झाली नाही. त्यामुळे त्यांनी हा विषय मागील स्थायी समितीच्या बैठकीत पुढे ढकलला होता. अखेर, गुरुवारी झालेल्या बैठकीत हे धोरण कायमस्वरूपी रद्द करण्याचा निर्णय घेण्यात आला.
पुढील वाटचाल
पुणे महापालिकेच्या या निर्णयामुळे शहरातील कला आणि संस्कृती क्षेत्रातील कार्यकर्त्यांमध्ये नाराजी पसरली आहे. शहराच्या सांस्कृतिक विकासासाठी नवीन धोरण तयार करण्याची मागणी आता जोर धरू लागली आहे. महापालिका यावर काय भूमिका घेते, हे पाहणे महत्त्वाचे ठरणार आहे.
न्यूज अनकट प्रतिनिधी सोनाली तांबे
