युक्रेन, 8 मार्च 2022: युक्रेनसोबतच्या युद्धादरम्यान रशियाने चार भागात युद्धविराम जाहीर केला आहे. त्यामुळे भारतीय विद्यार्थ्यांनाही दिलासा मिळणार आहे. युक्रेनच्या ज्या चार भागात रशियाने युद्धविराम घोषित केला आहे त्यात राजधानी कीव तसेच मारियुपोल, खार्किव आणि सुमी यांचा समावेश आहे.
तेथे अडकलेल्या लोकांना बाहेर काढण्यासाठी रशियाने ही वेळ दिली आहे. युक्रेनच्या सुमीमध्ये अजूनही मोठ्या संख्येने भारतीय विद्यार्थी अडकले आहेत, त्यांना बाहेर काढणे आता सोपे होणार आहे. रशियाने यापूर्वीही युद्धविरामाची चर्चा केली असली तरी त्यानंतर या युद्धविरामाचेही उल्लंघन करण्यात आले.
अंदाजानुसार, 600 हून अधिक भारतीय अजूनही सुमीमध्ये अडकले आहेत. गेल्या 10 दिवसांपासून सुमीमध्ये रशियन सैन्याचा गोळीबार सुरू असल्याने हे विद्यार्थी भीतीच्या छायेखाली जगत आहेत.
युक्रेनमधून भारतीयांना बाहेर काढण्यासाठी मोदी सरकार ऑपरेशन गंगा चालवत आहे. रविवारी मिळालेल्या माहितीनुसार, ऑपरेशन गंगा अंतर्गत आतापर्यंत 76 उड्डाणे पाठवण्यात आली आहेत, ज्यामध्ये 15,920 भारतीयांना युक्रेनमधून आणण्यात आले आहे. पोलंडमधील रझेझो, बुडापेस्ट आणि सुसेवा (रोमानिया) येथून भारतीयांना बाहेर काढले जात आहे.
युद्धाच्या सुरुवातीच्या काळात, असा अंदाज होता की युक्रेनमध्ये सुमारे 20,000 भारतीय विद्यार्थी आणि नागरिक होते. मात्र बचाव कार्यादरम्यान त्यांची संख्या अधिक असल्याचे दिसून आले. फेब्रुवारीच्या शेवटच्या आठवड्यापर्यंत 21 हजार भारतीयांनी युक्रेन सोडले होते. त्यात भारतात परतलेल्या 19,920 लोकांचाही समावेश होता.
न्यूज अनकट प्रतिनिधी: ईश्वर वाघमारे
