राहुल गांधी लडाखच्या दौऱ्यावर

नवी दिल्ली, २० ऑगस्ट २०२३ : काँग्रेसचे माजी अध्यक्ष आणि खासदार राहुल गांधी सध्या लडाख दौऱ्यावर आहेत, तसेच आज देशाचे माजी पंतप्रधान राजीव गांधी यांची जयंती आहे. यावेळी काँग्रेस नेते राहुल गांधी यांनी लडाखमधील १४२७० फूट उंचीवर असलेल्या पंगत्सो तलावाच्या काठावर त्यांचे वडील आणि भारताचे माजी पंतप्रधान राजीव गांधी यांना श्रद्धांजली वाहिली.

तसेच या भागात राजीव गांधी यांच्या स्मरणार्थ आयोजित केलेल्या प्रार्थना सभेला राहुल यांनी हजेरी लावली. प्रार्थना सभेनंतर राहुल गांधी यांनी प्रसारमाध्यमांशी बातचीत केली. यावेळी राहुल गांधी म्हणाले, मला इथल्या लोकांनी सांगितलं, चीनचं सैन्य भारतीय सीमेत घुसलं आहे. दुसऱ्या बाजूला आपलं सरकार आणि आपले पंतप्रधान दावा करत आहेत की आपली एक इंचही जमीन गेलेली नाही. परंतु ते सत्य नाही. इथले लोक काय म्हणतायत ते तुम्ही ऐका. तुम्ही इथल्या कोणालाही विचारू शकता.

राहुल गांधी म्हणाले इथले लोक त्यांच्या गायी-म्हशींना ज्या ठिकाणी चरण्यासाठी घेऊन जात होते ती जमीन (चरई क्षेत्र) चीनने बळकावली आहे. त्यामुळे हे लोक तिकडे त्यांची जनावरं नेऊ शकत नाहीत. लडाखमध्ये मोठ्या प्रमाणात बेरोजगारी आणि महागाई वाढली आहे. परंतु, जनतेचे प्रश्न सरकार ऐकत नाही, आम्ही ते ऐकून घेऊ.

राहुल गांधी सध्या लडाखच्या दौऱ्यावर आहेत. ५ ऑगस्ट २०१९ रोजी जम्मू आणि काश्मीरमधून कलम ३७० रद्द केल्यानंतर आणि राज्याची केंद्रशासित प्रदेशात पुनर्रचना झाल्यानंतर राहुल गांधी यांचा हा पहिला लडाख दौरा आहे. पुढच्या आठवड्यात ते कारगिलला जाणार आहेत. जिथे पुढच्या महिन्यात हिल कौन्सिलच्या निवडणुका होणार आहेत

यावेळी प्रसारमाध्यमांनी राहुल गांधी यांना लडाखला येण्याचं कारण विचारलं, त्यावर राहुल गांधी म्हणाले, भारत जोडो यात्रेदरम्यान, मला लडाखला जायचं होतं, परंतु काही कारणास्तव ते शक्य झालं नाही. त्यामुळे मी आत्ता इथे आलो आहे. लडाखमधील नागरिकांच्या सरकारविरोधात अनेक तक्रारी आहेत. त्यांना दिलेल्या दर्जामुळे ते खूश नाहीत. लडाखच्या जनतेला प्रतिनिधित्व हवं आहे. त्यांना वाटतं की त्यांचा हा प्रदेश नोकरशहांनी नव्हे तर जनतेने चालवावा, त्यांच्या प्रतिनिधिंनी चालवावा.

जम्मू-काश्मीर काँग्रेस कमिटीचे अध्यक्ष विकास रसूल वली यांनी पत्रकार माध्यमांशी बोलताना सांगितलं की, राजीव गांधींनी देशासाठी बलिदान दिलं. त्यांच्या स्मरणार्थ आम्ही इथे जमलो आहोत. तसेच यावेळी राहुल गांधी यांनी त्यांचे वडील दिवंगत राजीव गांधी यांचं स्मरण केलं. ते म्हणाले, माझे वडील हे माझ्या महान शिक्षकांपैकी एक होते.

न्यूज अनकट प्रतिनिधी : वैभव शिरकुंडे