नवी दिल्ली, १३ जून २०२१: ४ जून २०२१ रोजी संपलेल्या आठवड्यात देशाचा परकीय चलन साठा ६.८४२ अब्ज डॉलर्सने वाढून ६०५.००८ अब्ज डॉलरच्या विक्रमी उच्चांकावर पोहोचला. देशाचा परकीय चलन साठा प्रथमच ६०० अब्ज डॉलर्स वर गेला आहे. रिझर्व्ह बँक ऑफ इंडियाने म्हणजेच आरबीआयने शुक्रवारी जाहीर केलेल्या आकडेवारीवरून हे दिसून येते.
यापूर्वी २८ मे २०२१ रोजी संपलेल्या आठवड्यात परकीय चलन साठा ५.२७१ अब्ज डॉलर्सने वाढून ५९८.१६५ अब्ज डॉलर्सवर आला होता. २१ मे रोजी संपलेल्या आठवड्यात तो २.८६५ अब्ज डॉलर्सने वाढून ५९२.८९४ अब्ज डॉलरवर गेला होता. त्याच वेळी १४ मे २०२१ रोजी संपलेल्या शेवटच्या आठवड्यात परकीय चलन साठा ५.६३ कोटी डॉलर्सने वाढून ५९०.०२८ अब्ज डॉलर्सवर गेला.
एफसीएमध्ये वाढ झाल्यामुळे परकीय चलन साठ्यात वाढ
२८ मे रोजी संपलेल्या आठवड्यात परकीय चलन साठ्यातील वाढीचे मुख्य कारण परकीय चलन मालमत्ता म्हणजे एफसीए (Foreign Currency Assets) मध्ये होते, जे एकूण चलन साठ्यातील महत्त्वपूर्ण घटक आहे. रिझर्व्ह बँकेने जाहीर केलेल्या साप्ताहिक आकडेवारीनुसार, या अहवालात परकीय चलनाची मालमत्ता ७.३६२ अब्ज डॉलरने वाढून ५६०.८९० अब्ज डॉलरवर पोचली आहे. एफसीए डॉलर मध्ये व्यक्त केले जाते. यात डॉलर व्यतिरिक्त युरो, पौंड आणि येनमध्ये नामित मालमत्तेचा समावेश आहे.
देशातील सोन्याच्या साठ्यात घट
अहवालात आठवड्यात सुवर्ण साठा ५०.२ कोटी डॉलर्सने घसरून ३७.६०४ अब्ज डॉलरवर गेला आहे. आंतरराष्ट्रीय नाणेनिधी (आयएमएफ) मधील एसडीआर (Special Drawing Rights) अर्थात विशेष रेखांकन अधिकार १० लाख डॉलर ने कमी होऊन १.५१३ अब्ज डॉलर्सवर गेले. त्याचबरोबर आयएमएफकडे देशातील साठादेखील १.६ कोटी डॉलर्सने घसरून ५ अब्ज डॉलर्सवर आला आहे.
न्यूज अनकट प्रतिनिधी: ईश्वर वाघमारे
