सरकारी नोकरीसाठी वयोमर्यादेत शिथिलता; राज्य सरकारच्या स्तुत्य निर्णयाने उमेदवारांत आनंदाचे वातावरण

मुंबई, ४ मार्च २०२३ : महाराष्ट्र सरकारने नोकऱ्यांसाठीची वयोमर्यादा दोन वर्षांनी वाढविली आहे. कोविड काळात रिक्त जागा न मिळाल्याने आणि या कालावधीत त्यांचे वय उलटून गेल्यामुळे सरकारी नोकरीच्या परीक्षेला बसू न शकलेल्या उमेदवारांसाठी ही मोठी दिलासादायक बाब असल्याचे समजते. आता सरकारने वयोमर्यादेत शिथिलता देऊन त्यांच्यासाठी आनंदाची बातमी दिली आहे. शिंदे-फडणवीस सरकारच्या या निर्णयानंतर आता वयाची सवलत ३१ डिसेंबर २०२३ पर्यंत लागू राहणार आहे.

महाराष्ट्र शासनाच्या वतीने राज्य प्रशासनातील विविध विभागांमध्ये ७५ हजार पदांसाठी भरती जाहीर करण्यात आली. या भरतीसाठी हा निर्णय अत्यंत महत्त्वाचा मानला जात आहे. यंदाच्या स्वातंत्र्याच्या अमृतमहोत्सवानिमित्त राज्य सरकारने ७५ हजारांची बंपर भरती जाहीर केली आहे. कोरोनाच्या काळात दोन वर्षे स्पर्धा परीक्षांचे आयोजन करता आले नाही. अशा स्थितीत अनेक उमेदवारांचे वय निघून गेले. अशा विद्यार्थ्यांच्या वतीने वयोमर्यादेत शिथिलता देण्याची विशेष मागणी करण्यात आली होती. त्यांची मागणी मान्य करण्यात आली असून, आता वयाची सवलत दोन वर्षांसाठी वाढविण्यात आली आहे. आतापर्यंत खुल्या प्रवर्गातील उमेदवारांची वयोमर्यादा जी ३८ वर्षे होती ती आता ४० वर्षे करण्यात आली आहे. मागासवर्गीय उमेदवारांसाठी पूर्वी ४३ वर्षे असलेली वयोमर्यादा आता ४५ वर्षे करण्यात आली आहे. ३१ डिसेंबर २०२३ पर्यंत, ज्या परीक्षांशी संबंधित जाहिराती येतील त्या परीक्षांमध्ये वयोमर्यादेची शिथिलता लागू असेल.

महाराष्ट्राच्या शिंदे-फडणवीस सरकारनेही याप्रकरणी आपला आदेश जारी केला आहे. महाराष्ट्रातील लाखो विद्यार्थी नोकऱ्या मिळविण्याच्या संघर्षात गुंतले आहेत. त्यासाठी ते रात्रंदिवस मेहनत करतात. यात अनेकांना यश मिळते, अनेकांना ते मिळत नाही. मग ते प्रत्येक कामासाठी प्रयत्न करतात. असे केल्याने अनेकांची वयोमर्यादा संपते. अशा परिस्थितीत महाराष्ट्र सरकारचा हा निर्णय अनेक विद्यार्थ्यांसाठी दिलासादायक आहे.

‘न्यूज अनकट’ प्रतिनिधी : सूरज गायकवाड