खार्किवमध्ये रशियाचा क्षेपणास्त्र हल्ला, रुग्णालय उद्ध्वस्त, 8 ठार

Russia Ukraine War, 2 मार्च 2022: युक्रेनमधील खार्किवमध्ये रशियाने पुन्हा हल्ला केला. हा क्षेपणास्त्र हल्ला निवासी भागात करण्यात आल्याचे सांगण्यात येत आहे. या हल्ल्यात रुग्णालयालाही फटका बसला. या हल्ल्यात आठ जणांचा मृत्यू झाल्याची माहिती आहे.

रशियाच्या हवाई हल्ल्यानंतर खार्किवमध्ये कर्फ्यू लागू करण्यात आला आहे. खार्किवमध्ये रशियाचे हल्ले सुरूच आहेत. दुपारी 4 ते सकाळी 6 पर्यंत कर्फ्यू सुरू राहणार आहे. लोकांना रस्त्यावर जाण्यास आणि कार वापरण्यास बंदी घालण्यात आली आहे. अलार्म वाजल्यावर नागरिकांना सावध राहून निवारागृहात जाण्यास सांगितले आहे.

खार्किवमध्ये भारतीय विद्यार्थ्याचा मृत्यू

याआधी मंगळवारी खार्किवमध्ये रशियन हल्ल्यात एका भारतीय विद्यार्थ्याचा मृत्यू झाला होता. भारतीय विद्यार्थी नवीन हा कर्नाटकचा रहिवासी होता. तो खार्किवमध्ये वैद्यकशास्त्र शिकत होता.

सोमवारीही खार्किवमध्ये हल्ला झाला होता

याआधी सोमवारीही रशियाने युक्रेनमधील खार्किवमध्ये रॉकेट हल्ला केला होता. या हल्ल्यात 11 जणांचा मृत्यू झाल्याची माहिती युक्रेनच्या गृह मंत्रालयाने दिली आहे. रशियन सैन्य रविवारी खार्किवमध्ये दाखल झाले. यादरम्यान रशियन सैन्यानेही जोरदार गोळीबार केला. यादरम्यान युक्रेनच्या सैनिकांनीही प्रत्युत्तर दिले.

युक्रेनच्या अधिकाऱ्यांनी दावा केला आहे की रशियन सैन्याने युक्रेनमधील दुसऱ्या क्रमांकाचे मोठे शहर खार्किवमध्ये प्रवेश केला आहे. हा लढा आता रस्त्यावर आला आहे. कारण रशियन सैनिक शस्त्रास्त्रे घेऊन खार्किवच्या रस्त्यांवर फिरत आहेत. येथील परिस्थिती अत्यंत बिकट बनली आहे.

खार्किव हे युक्रेनचे दुसरे मोठे शहर आहे

खार्किव हे युक्रेनमधील दुसऱ्या क्रमांकाचे मोठे शहर आहे. 1654 मध्ये स्थापन झालेले खार्किव हे युक्रेनमधील पहिले शहर आहे ज्याने सोव्हिएत सत्ता आणि सोव्हिएत सरकारची स्थापना झाल्याचे घोषित केले आहे. डिसेंबर 1919 ते जानेवारी 1934 पर्यंत, खार्किव ही युक्रेनियन सोव्हिएत समाजवादी प्रजासत्ताकची पहिली राजधानी होती, त्यानंतर राजधानी कीव येथे हलविण्यात आली.

सध्या खार्किव हे युक्रेनचे एक प्रमुख सांस्कृतिक, वैज्ञानिक आणि शैक्षणिक, वाहतूक आणि औद्योगिक केंद्र आहे, ज्यामध्ये 6 संग्रहालये, 7 थिएटर आणि 80 ग्रंथालये आहेत.

न्यूज अनकट प्रतिनिधी: ईश्वर वाघमारे