काबूल, १८ ऑगस्ट २०२१: चीन आणि पाकिस्तान तालिबानच्या सत्तेला मान्यता देण्यास तयार आहेत आणि आता रशियाही तीच भूमिका घेत असल्याचे दिसते. अफगाणिस्तानची राजधानी काबूल ताब्यात घेतलेल्या तालिबानच्या वृत्तीचे रशियाने कौतुक केले आहे. अफगाणिस्तानमधील रशियाचे राजदूत दिमित्री झिरनोव यांनी तालिबानच्या वर्तनाचे कौतुक केले आणि त्यांचा दृष्टिकोन चांगला आणि सकारात्मक असल्याचे वर्णन केले. ते म्हणाले की, कट्टरपंथी इस्लामी गटाने पहिल्या २४ तासांमध्ये काबुलला पूर्वीच्या अधिकाऱ्यांपेक्षा अधिक सुरक्षित केले आहे. जरी भारताने तालिबानच्या सत्तेला मान्यता देण्यासाठी अद्याप कोणतेही विधान केलेले नाही, परंतु आतापर्यंत भारत लोकशाही पद्धतीने निवडलेल्या अशरफ घनी सरकार सोबतच आहे. अशा स्थितीत रशियाचे हे विधान भारतासाठी धक्क्यापेक्षा कमी नाही.
रॉयटर्सच्या म्हणण्यानुसार, मॉस्कोच्या इको मोस्कवी रेडिओ स्टेशनशी बोलताना झिरनोव म्हणाले, “परिस्थिती शांत आणि चांगली आहे आणि शहरात सर्व काही शांत झाले आहे. तालिबानच्या ताब्यात असलेल्या काबूलमधील परिस्थिती (अध्यक्ष) अशरफ घनी यांच्यापेक्षा चांगली आहे.”
तालिबान्यांनी जगाला चकित केले आणि विजेच्या वेगाने अफगाणिस्तान काबीज केले. राष्ट्रपती अशरफ घनी तालिबान काबुलमध्ये प्रवेश करताच देश सोडून पळून गेले. अफगाणिस्तानचे अध्यक्ष म्हणाले की, त्यांना रक्तपात थांबवायचा असल्याने त्यांनी देश सोडला. अशरफ घनी आता कुठे आहे, याबाबत अद्याप अधिकृत माहिती मिळालेली नाही.
दरम्यान, रशियाचे परराष्ट्र मंत्री सर्गेई लावरोव आणि अमेरिकेचे परराष्ट्र मंत्री अँटोनी ब्लिंकेन यांनी सोमवारी अफगाणिस्तानच्या परिस्थितीवर फोनवर चर्चा केली आणि दोन्ही नेत्यांनी या मुद्द्यावर चीन, पाकिस्तान आणि संयुक्त राष्ट्रांशी चर्चा सुरू ठेवण्याचे मान्य केले. रशियाच्या परराष्ट्र मंत्रालयाने सांगितले की, अँटोनी ब्लिंकेनने सर्गेई लावरोव यांना अफगाणिस्तानच्या संकटाबाबत, विशेषत: अमेरिकन दूतावासातील कर्मचाऱ्यांना बाहेर काढणे आणि गंभीर मानवतावादी समस्या सोडवण्याबाबत अमेरिकन प्रशासनाने काय पावले उचलली याची माहिती दिली.
सेर्गेई लावरोव यांनी अँटोनी ब्लिन्केन यांना कायदा आणि सुव्यवस्थेसह स्थिरता मिळवण्यासाठी अफगाणिस्तानमधील परिस्थिती आणि तेथील राजकीय शक्तींशी असलेल्या त्याच्या संपर्कांबद्दल रशियाच्या दृष्टिकोनाबद्दल सांगितले. रशियन परराष्ट्र मंत्रालयाने म्हटले आहे की, नवीन परिस्थितीमध्ये सर्वसमावेशक आंतर-अफगाणिस्तान संवादाची पायाभरणी करण्यासाठी दोन्ही देशांच्या परराष्ट्र मंत्र्यांनी चीन, पाकिस्तान आणि इतर संबंधित देश आणि संयुक्त राष्ट्रांच्या प्रतिनिधींशी सल्लामसलत सुरू ठेवण्यास सहमती दर्शविली आहे.
तालिबानने रविवारी अफगाणिस्तानची राजधानी काबूलवर कब्जा केला आणि अमेरिका आणि इतर देशांना त्यांचे नागरिक आणि मुत्सद्दी लोकांना बाहेर काढण्यास भाग पाडले. पण रशियाने म्हटले की तालिबानने आश्वासन दिले आहे की रशियन दूतावास सुरक्षित आहे आणि ते आपले कामकाज चालू ठेवू शकते.
याआधी, काबुलमधील रशियाच्या दूतावासाने सोमवारी दावा केला होता की, अफगाणिस्तानचे अध्यक्ष अशरफ घनी खूप पैसे घेऊन देश सोडून पळून गेले आहेत. आरआयए या वृत्तसंस्थेच्या अहवालानुसार, अशरफ घनी चार कार आणि हेलिकॉप्टरमध्ये रोख रक्कम घेऊन निघाले.
न्यूज अनकट प्रतिनिधी: ईश्वर वाघमारे
