नवी दिल्ली, 19 सप्टेंबर 2021: कोरोना काळात गरीब आणि मजुरांना मदत करून जगभरात प्रसिद्ध झालेला अभिनेता सोनू सूद वादाच्या भोवऱ्यात अडकलेले दिसत आहेत. आयकर विभागाने मुंबई, लखनऊ, कानपूर, जयपूर, दिल्ली आणि गुरुग्रामसह 28 ठिकाणी छापे टाकून 3 दिवसांनी 20 कोटींची करचुकवेगिरी केल्याचा दावा केला आहे. या छाप्यानंतर अभिनेता किंवा त्याच्या पीआर टीमकडून कोणतेही विधान आले नाही.
आयटी ने दावा केला आहे की, “तपासात असे उघड झाले आहे की सोनू सूदने परदेशी देणगीदारांकडून 21 कोटींचा ना-नफा निधी गोळा केला, जो अशा व्यवहारांना नियंत्रित करणाऱ्या कायद्याचे उल्लंघन आहे.
लखनौमधील एका कंपनीचे 11 लॉकर्स सापडले
आयकर विभागाने त्याच्या चॅरिटी ट्रस्टवर परदेशी योगदान कायद्याच्या नियमांचे उल्लंघन केल्याचा आरोप केला आहे. आयकर विभागाच्या या तपासानंतर अंमलबजावणी संचालनालयाची (ईडी) देखील येत्या काळात या प्रकरणात एन्ट्री होऊ शकते.
आयकर विभागाने लखनऊमधील एका इन्फ्रा कंपनीवर छापा टाकल्याचे सांगितले आहे. मुंबईतील अभिनेत्याची या कंपनीत भागीदारी आहे आणि या कंपनीने मोठ्या प्रमाणावर आयकर टाळला आहे. कंपनीच्या दिल्ली, जयपूर, लखनौ आणि गुरुग्राम येथील ठिकाणी छापे टाकण्यात आले आणि छाप्यांदरम्यान 1 कोटी 8 लाख रुपयांची रोकड जप्त करण्यात आली. 11 लॉकर्स देखील सापडले आहेत. या कंपनीच्या 175 कोटी रुपयांच्या व्यवहारावर आयकर विभागालाही संशय आहे. या प्रकरणाचा तपास सुरू आहे.
सूदच्या ठिकाणा मधून अनेक कागदपत्रे सापडली
आयकर विभागाचा दावा आहे की सोनू सूद आयकर विभागाला त्याच्या उत्पन्नाबाबत जी माहिती देत आहे ती संशयाखाली आहे. आयकर विभागाला सोनू सूदच्या ठिकाणी कागदपत्रे सापडली, ज्यातून त्याने मोठ्या प्रमाणात कर चुकवला असल्याचे दिसून आले.
शेल कंपन्यांच्या माध्यमातून पैसे हलवण्याचा प्रयत्न
सूत्रांनी दिलेल्या माहितीनुसार, सोनू सूदला चित्रपट जगतातून मिळालेल्या पैशातून त्याने आपले उत्पन्न न दाखवून अनेक बनावट कंपन्यांच्या माध्यमातून असुरक्षित कर्ज दाखवले आहे. जेव्हा या शेल कंपन्यांच्या सूत्रधारांची चौकशी करण्यात आली तेव्हा त्यांनी सोनू सूदला बोगस एंट्री दिल्याचे प्रतिज्ञापत्राद्वारे स्वीकारले. प्राप्तिकर विभागाच्या दाव्यानुसार, आतापर्यंत 20 कोटी रुपयांपेक्षा अधिकची आयकर चोरी उघडकीस आली आहे.
ट्रस्टच्या नावाने 18.94 कोटी जमा
तपासात असेही समोर आले आहे की सोनू सूदने 2 जुलै 2020 रोजी चॅरिटी ट्रस्टची स्थापना केली होती आणि या ट्रस्टमध्ये 18 कोटी 94 लाख रुपये आले होते. यापैकी 1 कोटी 90 लाख रुपये धार्मिक कामांवर खर्च करण्यात आले. 17 कोटी रुपये अद्याप या ट्रस्टच्या खात्यात आहेत. आयकर विभागाच्या म्हणण्यानुसार, या खात्याच्या कागदपत्रांची छाननी करताना असे आढळून आले की सोनू सूदच्या चॅरिटी ट्रस्टला परदेशातूनही 2 कोटी 1 लाख रुपये मिळाले आहेत.
न्यूज अनकट प्रतिनिधी: ईश्वर वाघमारे
