राष्ट्रपिता महात्मा गांधींच्या ‘स्वच्छ भारता‘च्या स्वप्नाला प्रत्यक्षात आणण्यासाठी पिंपरी-चिंचवड महापालिकेने १७ सप्टेंबर ते २ ऑक्टोबर या कालावधीत ‘स्वच्छता ही सेवा’ या विशेष अभियानाचे आयोजन केले आहे. स्वच्छतेला केवळ एक सरकारी कार्यक्रम न ठेवता, ती एक सामाजिक चळवळ बनावी आणि नागरिकांचा त्यात सक्रिय सहभाग असावा, हा या अभियानाचा मुख्य उद्देश आहे.
या १५ दिवसांच्या कालावधीत शहरात विविध उपक्रम राबवून स्वच्छतेचा संदेश प्रत्येक नागरिकांपर्यंत पोहोचवण्याचा प्रयत्न केला जाईल. यात मुख्यत्वे सार्वजनिक ठिकाणांची स्वच्छता मोहीम, स्वच्छ हरित महोत्सव, आणि प्लास्टिक प्रदूषणविरोधी जनजागृती यावर विशेष भर दिला जाणार आहे. उद्याने, रस्ते, बसस्थानके आणि बाजारपेठांची स्वच्छता करून शहराचे सौंदर्य जपले जाईल. त्याचबरोबर, सफाई कर्मचाऱ्यांच्या आरोग्य तपासणीचे शिबिर घेऊन त्यांच्या कामालाही महत्त्व दिले जाईल.
या अभियानांतर्गत घरोघरी जनजागृती केली जाणार आहे, जिथे ओला-सुका कचरा वर्गीकरण आणि घरगुती कंपोस्टिंगसारख्या महत्त्वाच्या गोष्टींबद्दल प्रात्यक्षिके दाखवली जातील. विद्यार्थी, व्यापारी, महिला गट आणि स्वयंसेवी संस्था यांच्या सहभागातून स्वच्छता रॅली आयोजित केली जाईल. या माध्यमातून स्वच्छतेचा संदेश शहराच्या कानाकोपऱ्यात पोहोचेल अशी अपेक्षा आहे. महापालिकेच्या आरोग्य विभागाने सर्व नागरिकांना या स्वच्छता महोत्सवात सहभागी होण्याचे आवाहन केले आहे.
न्यूज अनकट प्रतिनिधी सोनाली तांबे
