मुंबईत भीषण अपघात: वांद्रे येथे तीन मजली इमारत कोसळली, एकाचा मृत्यू, 22 जखमी

मुंबई, 9 जून 2022: मुंबईतील वांद्रे भागात गुरुवारी मध्यरात्री तीन मजली इमारत कोसळून झालेल्या दुर्घटनेत एकाचा मृत्यू झाला असून 22 जण जखमी झाले आहेत. यातील 6 जणांची प्रकृती चिंताजनक असल्याने मृतांचा आकडा वाढण्याची शक्यता आहे. जखमींना उपचारासाठी जवळच्या खासगी रुग्णालयात दाखल करण्यात आले आहे. वांद्रे येथील शास्त्रीनगर भागात ही इमारत आहे. घटनेची माहिती मिळताच अग्निशमन दलाच्या अर्धा डझन गाड्या, रुग्णवाहिका आणि महापालिकेचे पथक घटनास्थळी पोहोचले असून ढिगारा हटवण्याचे काम सुरू आहे. ढिगाऱ्याखाली अडकलेल्या लोकांना सकाळी 10 वाजेपर्यंत बाहेर काढण्यात आले.

ढिगाऱ्यातून 23 जणांची सुटका

घटनास्थळी पोहोचलेले डीसीपी मंजुनाथ सिंह म्हणाले, “मुंबईच्या वांद्रे भागातील शास्त्रीनगरमध्ये सकाळी 12.15 च्या सुमारास तीन मजली इमारत कोसळली. तळमजल्यावरील सर्व नागरिक सुरक्षित आहेत. पहिल्या मजल्यावर बसलेले सहा तर दुसऱ्या मजल्यावर बसलेले सतरा जण जखमी झाले. त्यापैकी एकाचा मृत्यू झाला असून, इतर 16 जणांना रुग्णालयात दाखल करण्यात आले आहे. ढिगाऱ्याखालून सुमारे 23 जणांना बाहेर काढण्यात यश आले आहे. ते पुढे म्हणाले की, मदत आणि बचाव कार्य सुरू आहे, आम्ही पुष्टी करू इच्छितो की ढिगाऱ्यात कोणीही अडकले नाही.

बाजूचं घर कोसळल्याने ही दुर्घटना घडली

मुंबईच्या वांद्रे परिसरात उत्तर प्रदेश आणि बिहार राज्यातून कामाच्या शोधात मुंबईत येणाऱ्या मजुरांची संख्या मोठी आहे. तीन मजली इमारतीच्या शेजारी असलेले घर दोन दिवसांपूर्वी जमीनदोस्त झाले होते, त्यामुळे हा अपघात झाल्याचे समजते. स्थानिकांच्या म्हणण्यानुसार, अपघातात मृत्युमुखी पडलेली व्यक्ती घटनास्थळावरून जात असताना इमारतीचा मोठा ढिगारा खाली पडल्याने त्याचा मृत्यू झाला.

न्यूज अनकट प्रतिनिधी: ईश्वर वाघमारे