नवी दिल्ली, ९ ऑगस्ट २०२३ : एनडीएच्या खासदारांची नवी दिल्लीतील महाराष्ट्र सदनात काल महत्त्वाची बैठक बोलावण्यात आली होती. या बैठकीला स्वत: पंतप्रधान नरेंद्र मोदी आणि केंद्रीय गृहमंत्री अमित शाह उपस्थित होते. या बैठकीसाठी राष्ट्रवादी काँग्रेसच्या अजित पवार गटाकडून खासदार प्रफुल्ल पटेल उपस्थित होते. यावेळी एनडीएच्या पार पडलेल्या बैठकीत नरेंद्र मोदी यांनी शिवसेनेचा उल्लेख करत आपली भूमिका मांडली. यावेळी त्यांनी शिवसेनेविषयी केलेल्या वक्तव्यांना काही राजकीय किनार असण्याची शक्यता आहे. कारण पुढच्या वर्षात देशात लोकसभेची निवडणूक होणार आहेत.
महाराष्ट्रात विधानसभेच्या २०१९ च्या निवडणुकीनंतर उद्धव ठाकरे यांनी भाजपची साथ सोडली आणि त्यांनी काँग्रेस, राष्ट्रवादी काँग्रेससोबत सत्ता स्थापन केली होती. उद्धव ठाकरे यांनी भाजपची साथ सोडण्यामागे मातोश्रीवर बंद दाराआड झालेल्या बैठकीचे कारण शिवेसेनकडून सांगण्यात आले होते. अमित शाह, तत्कालीन मुख्यमंत्री देवेंद्र फडणवीस आणि उद्धव ठाकरे यांच्यात त्यावेळी मुख्यमंत्रीपदाचा फॉर्म्युला ठरला होता, असा दावा शिवसेनेकडून केला जात होता. यावरुन वाद निर्माण झाला होता. दोन्हीकडून वेगवगळे दावे सातत्याने गेल्या तीन वर्षांपासून केले जात आहेत. असे असताना आजच्या एनडीच्या बैठकीतही मोदींनी शिवसेनेचा उल्लेख केला.
यावेळी एनडीएची युती गेल्या २५ वर्षांपासून कशी मजबूत आहे, हे सांगण्याचा प्रयत्न नरेंद्र मोदींकडून करण्यात आला. यावेळी त्यांनी पश्चिम बंगालच्या मुख्यमंत्री ममता बॅनर्जी, माजी केंद्रीय रेल्वे मंत्री लालूप्रसाद यादव, बिहारचे मुख्यमंत्री नितीश कुमार यांची उदाहरणे दिली. हे नेते एकेकाळी एनडीएसोबत होते. पण ते आता एनडीएपासून दूर गेले. त्यांना आम्ही दूर केले नाही. तर ते स्वत:हून दूर गेले. हे सांगत असतानाच त्यांनी शिवसेनेचा उल्लेख केला. उद्धव ठाकरे आणि आमची युती ही खूप मजबूत होती. पण आम्ही त्यांना दूर केले नाही तर ते आमच्यापासून दूर गेले, असे मोदी बैठकीत म्हणाले.
या बैठकीत पंतप्रधान नरेंद्र मोदी यांच्याकडून शिवसेनेचा उल्लेख करण्यात आला. शिवसेना ठाकरे गटाचे प्रमुख उद्धव ठाकरे यांनी आपल्याशी असलेली युती तोडली. आम्ही तोडली नाही, असे वक्तव्य नरेंद्र मोदी यांनी बैठकीत केले. विशेष म्हणजे या बैठकीत पंतप्रधान नरेंद्र मोदींनी देशातल्या एनडीएमधून बाहेर पडलेल्या पक्षांचा दाखला दिला. त्यांनी एनडीएच्या खासदारांसमोर हा दाखला दिला. यावेळी त्यांनी खासदारांना यापुढेही एनडीए म्हणून कायम राहण्याचे आवाहन केले. काँग्रेसप्रमाणे भाजप अहंकारी नाही. त्यामुळे भाजप सत्तेवरून पायउतार होणार नाही, असेही मोदी या बैठकीत म्हणाले.
नरेंद्र मोदी यांच्याकडून यावेळी सामना वृत्तपत्राचादेखील दाखला देण्यात आला. २०१४ पासून शिवसेना एनडीएसोबत सत्तेत असतानाही सामना मधून वारंवार टीका केली जात होती. मात्र आम्ही त्यांना प्रतिउत्तर दिले नाही, असे पंतप्रधान बैठकीत म्हणाले. दरम्यान, या बैठकीत मोदींनी खासदारांना लोकसभा निवडणुकीच्या तयारीला लागण्याच्या सूचना दिल्या.
न्यूज अनकट प्रतिनिधी : अनिल खळदकर
