गरिबीने पाकिस्तानी जनता बेहाल, पाकिस्तानचे पंतप्रधान आपले कपडे विकण्यास तयार

इस्लामाबाद, 31 मे 2022: शेजारी देश पाकिस्तान सध्या गंभीर आर्थिक संकटाचा सामना करत आहे. एकीकडे परकीय कर्जाचा बोजा आहे आणि परकीय चलन साठा खालच्या पातळीवर आहे, तर दुसरीकडे मैद्यासह अनेक जीवनावश्यक वस्तूंचे भाव गगनाला भिडलेले आहेत. आर्थिक संकटाच्या पार्श्वभूमीवर पाकिस्तानमध्ये राजकारणही जोरात सुरू आहे. अलीकडेच सत्तेतून बाहेर पडलेले इम्रान खान आपल्या समर्थकांसह रॅली काढत आहेत. दरम्यान, पाकिस्तानचे नवनियुक्त पंतप्रधान शेहबाज शरीफ यांनी एक अजब विधान केले आहे. लोकांना संबोधित करताना शरीफ म्हणाले की, जनतेला स्वस्तात पीठ मिळावे म्हणून मी आपले कपडे विकण्यास देखील तयार आहे.

खैबर पख्तुनख्वाच्या मुख्यमंत्र्यांना आव्हान

पाकिस्तानी वृत्तपत्र डॉनने दिलेल्या माहितीनुसार, शरीफ रविवारी ठाकारा स्टेडियममध्ये एका जाहीर सभेला संबोधित करत होते. यादरम्यान त्यांनी खैबर पख्तूनख्वाचे मुख्यमंत्री महमूद खान यांना इशारा दिला की, येत्या 24 तासांत 10 किलोच्या पिठाच्या पाकिटाची किंमत 400 रुपये न दिल्यास ते आपले कपडे विकतील आणि स्वत: जनतेला स्वस्तात पीठ उपलब्ध करून देतील. शरीफ म्हणाले, ‘मी माझा मुद्दा पुन्हा सांगतो, मी माझे कपडे विकून लोकांना स्वस्तात पीठ पुरवेन.’

शरीफ यांच्या निशाण्यावर इम्रान खान

या काळात शरीफ यांनी माजी पंतप्रधान इम्रान खान यांनाही लक्ष्य केले. ते म्हणाले, ‘इम्रान खान यांनी देशाला आतापर्यंतची सर्वाधिक महागाई आणि बेरोजगारी भेट दिली आहे. खान यांनी 50 लाख घरे आणि एक कोटी नोकऱ्यांचे आश्वासन दिले होते. मात्र, ते पूर्ण करू शकले नाही आणि देशाला आर्थिक संकटात ढकलले. ते म्हणाले, ‘मी तुमच्यासमोर हे जाहीर करतो की, मी माझे आयुष्य पणाला लावेन, पण या देशाला समृद्धी आणि विकासाच्या मार्गावर घेऊन जाईन.’

यामुळं डिझेल-पेट्रोल महाग

यावेळी शरीफ यांनी पाकिस्तानमध्ये डिझेल-पेट्रोलच्या किमती गगनाला भिडल्याचाही उल्लेख केला. या परिस्थितीला माजी पंतप्रधान इम्रान खान जबाबदार असल्याचे ते म्हणाले. ते म्हणाले, ‘सर्वांसमोर सर्वांचा अपमान करणाऱ्या इम्रान खान यांना अविश्वास ठरावाद्वारे सत्तेतून बेदखल होईल, अशी खात्री असताना त्यांनी अशा वेळी पेट्रोलियम पदार्थांच्या किमती कमी केल्या, जेव्हा संपूर्ण जग त्यांच्या किमती वेगाने वाढत होते.

न्यूज अनकट प्रतिनिधी: ईश्वर वाघमारे